2023 йил январь ойида Ўзбекистон истеъмол бозорида товар ва хизматлар ўртача 0,82 фоизга қимматлашди. Бу ҳақда президент ҳузуридаги Статистика агентлиги ҳисоботида келтириб ўтилган.
Бу сўнгги уч йил ичида январь ойидаги энг паст кўрсаткичдир. Хусусан, 2022 йил январь ойида инфляция 0,87 фоизни, 2021 йилда 1 фоизни ташкил этган. 2020 йилнинг биринчи ойида эса кўрсаткич 0,59% га тенг бўлганди.
Йиллик ҳисобда инфляция 0,1 фоизга пасайиб, 12,2 фоизни ташкил этди.
Озиқ-овқат маҳсулотлари ой давомида ўртача 1 фоизга қимматлашган ҳолда нарх ва тарифлар ўсиши бўйича етакчи бўлди. Ноозиқ-овқат маҳсулотлари 0,6 фоизга, хизматлар 0,7 фоизга ошди.
Сут нархининг ойлик ўсиши декабрга нисбатан кескин секинлашди. Январь ойида 0,1% га қимматлашган бўлса, декабрда 2,4% га қимматлаганди. Тухум нархининг ўсиши ҳам декабрь ойида 5,2 фоиз бўлган бўлса, кўрсаткич январь ойида 2 фоизни ташкил этди.
Кунгабоқар ёғи ва шакар нархи кетма-кет тўртинчи ой, пахта ёғи нархи сўнгги уч ойда пасаймоқда. Январь ойида шакар 1,4 фоизга, кунгабоқар ёғи 0,7 фоизга, пахта ёғи 0,5 фоизга арзонлашди.
Шу билан бирга, охирги 12 ойда тухум 32 фоизга, пахта ёғи 6,8 фоизга, кунгабоқар ёғи 7,8 фоизга, шакар 40,2 фоизга, сут 16,6 фоизга, буғдой уни 43 фоизга, гуруч 25,5% га қимматлашган.
Сабзавот ва мевалар орасида пиёз энг кўп январь ойида — 44,7 фоизга (12 ой давомида 2,8 марта) қимматлашди. Бу кескин совуқ ва пиёз захираларининг бир қисми йўқотилиши билан боғлиқ. Ой давомида помидор 7,4 фоизга, булғор қалампири 7,2 фоизга, бақлажон 7,2 фоизга, бодринг 7 фоизга қимматлашди.
Кийим ва пойафзал нархи бир ой давомида 0,9 фоизга, йил давомида мос равишда 9,4 фоизга ва 9,6 фоизга ошди. Маиший техника 0,5% га (9,9%) ўсди.
Ой давомида стоматология хизматлари 2,9 фоизга, диагностик визуализацияси ва тиббий лаборатория хизматлари 1,1 фоизга қимматлашди.
Парвозлар учун нархлар ўзгаришининг юқори чегараси 6,1% ни ташкил этди, бу миллий валюта курсининг тебранишлари таъсири ҳамда 2020 йилда коронавирус пандемияси бошида тўхтатилган Хитой билан ҳаво қатновининг очилиши билан боғлиқ. Ушбу йўналишда тарифлар авиа хизматлар бозоридаги жорий ҳолатни ҳисобга олган ҳолда қайта кўриб чиқилган бўлиб, мазкур ўзгаришлар нархларнинг ўртача даражаларида намоён бўлди.
Меҳмонхоналар ва санаторийларда жойлаштириш январь ойида ўртача 9,3 фоизга қимматлашган (йил давомида — 19,6 фоиз), умумий овқатланиш шохобчалари нархлари эса 0,1 фоизга (йилга нисбатан — 22,1 фоизга) қимматлашган.
Иқтисодчи Отабек Бакиров ушбу ҳисоботга эътибор қаратар экан, электр ва газ ва ёқилғиси бошқа турларининг нархи январь ойида ўзгармаган, деб хулоса қилингани, қўшимчасига, «2023 йилнинг январь ойида қатор ҳудудларда бензин нархи пасайиши кузатилди» дея чиройли қофия билан абзац якунлангани келтирилган.
Йўловчи ташиш хизматлари 1,1% га, товар ташиш хизматлари эса 0,2% га қимматлаган, холос. Изоҳ шарт эмас. Биз жуда тез орада бир хонали инфляция тугул, ундан пастроғига ҳам эришамиз. Чунки биз аввал ҳам бу йўлдан ўтганмиз. Инфляцияни паст кўрсатишга уриниш Ўзбекистон учун янгилик эмас. Чунки инфляция қанчалик паст кўрсатилса, гўёки аҳолининг реал даромадлари шунча баландроқ ўсгандек кўринади. Маълумот учун, 21- асрдаги тарихимизда энг паст инфляция 2004 йилда чизилган. Атига 3,7%. Охирги 10 йилликда эса энг паст инфляция 2015 йилда, олдинги эпоха ўзининг платосига етганда чизилган: 5,6%, — деб ёзади иқтисодчи блогер.
