Ўзбекистонлик профессионал боксчи Бектемир Мелиқўзиев (11−1, 9 КО) якшанба куни Инглвуддаги (Калифорния, АҚШ) YouTube Theater шоусида ғолиб чиқди.

Суперўрта вазнда (76,2 кг гача) унга 34 ёшли америкалик Улисес Сиерра (17−3−2, 10 КО) рақиблик қилди.

26 ёшли ўзбекистонлик биринчи дақиқаларданоқ рақибидан устунлик келиб, уни ҳимояланишга мажбур қилди. Ниҳоят учинчи раундда Мелиқўзиев Сиеррани нокаутга учратди. Рақиб жангни давом эттирмоқчи бўлди, бироқ аниқ зарбадан кейин яна йиқилди. Ҳакам америкалик жангни давом эттира олмаслигига кўзи етиб, жангни тўхтатишга қарор қилди.

2016 йилги Олимпиада кумуш медали совриндори 2021 йил июнида Габриел Росадога нокаут эвазига мағлуб бўлгач, қаторасига тўртинчи жангида ғалаба қозонди. Ўзбекистонлик рақибини бир неча бор реваншга чақирган.