Европа Иттифоқи ва Марказий Осиё ўртасидаги ҳамкорликнинг барча йўналишлари минтақа мамлакатлари иқтисодиётини диверсификация қилиш ва Россия Федерациясига билвосита қарамликни енгиллаштиришга қаратилган. Бу ҳақда Европа иттифоқининг Ўзбекистондаги элчиси Шарлотта Адриан 16 декабрь куни журналистлар билан учрашувда айтиб ўтди.

Бу ҳамкорлик йўналишлари, хусусан, Марказий Осиё мамлакатлари иқтисодий ривожланиши, сув ресурсларидан самарали фойдаланиш ва энергия самарадорлиги, шунингдек, рақамлаштириш масалаларини ўз ичига олади, деди элчи.

Европа Иттифоқи кўмагига эга бўлган яна бир соҳа — Марказий Осиёдаги минтақавий ҳамкорликдир. «Ўзбекистоннинг Марказий Осиёдаги роли муҳим, чунки биз Ўзбекистонни Марказий Осиёда кўпроқ таъсир, янада кўпроқ ҳамкорлик ва минтақавий ҳамкорлик олиб бориш учун ўзига хос локомотив сифатида кўрамиз. Ўзбекистон нафақат ўз чегаралари хавфсизлиги, балки қўшни давлатлар билан ҳамкорлик қилишдан ҳам манфаатдор», — деди Шарлотта Адриан.

Элчи, шунингдек, Европа Иттифоқи Марказий Осиё давлатларининг шерикларни танлаш эркинлигига интилишида уларни қўллаб-қувватлашини эслатди. Бу ҳақда аввалроқ Европа иттифоқининг ташқи ишлар ва хавфсизлик сиёсати бўйича олий вакили Хосеп Боррель ҳам гапирганди.

«Биз Европа Иттифоқи ва Марказий Осиё ўртасидаги муносабатларнинг эксклюзивлигини эмас, балки танлаш эркинлигини таъминлашни истаймиз», — дея таъкидлади Шарлотта Адриан.

Европа Иттифоқи делегацияси ҳозирда Ўзбекистон билан ҳамкорлик, хусусан, 2021−2027 йилларга мўлжалланган кўп йиллик индикатив дастурга мувофиқ амалга оширилаётганини эслатиб ўтди. Уни молиялаштириш учун 83 млн евро, жумладан, фуқаролик жамияти ва инсон ҳуқуқларини ривожлантиришни қўллаб-қувватлаш учун 7 млн евро ажратилган.

Дастур доирасидаги ишлар учта устувор йўналиш бўйича амалга оширилмоқда: самарали давлат бошқаруви ва рақамли трансформация, инклюзив ва рақамли яшил ўсиш ҳамда «ақлли» ва экологик тоза қишлоқ хўжалиги секторини ривожлантириш.

Илгари Европа Иттифоқининг Ўзбекистон билан ҳамкорлиги асосан қишлоқ хўжалигига асосланган бўлиб, қўшма иш йўналишларининг ортиб бораётгани Европа Иттифоқининг Ўзбекистон билан шериклик алоқаларини кенгайтираётганидан далолатдир, деди Европа Иттифоқи делегати.

«Ҳамкорликнинг бу йўналишлари биз ўзимиз ўйлаб топган ёки ишлаб чиққан нарса эмас. Буларнинг барчаси ҳукумат билан ҳамкорликда қандай йўл билан ва қайси соҳаларда ёрдам бера олишимиз ҳақида олиб борган муҳокамаларимиз натижасидир», — дейилади элчихона хабарида.