Европа тикланиш ва тараққиёт банки (ЕТТБ) Ўзбекистоннинг Бухоро вилоятида умумий қуввати 1 ГВт гача бўлган иккита шамол электр станциясини қуриш ва фойдаланишга топширишга кўмаклашиш учун қиймати 520 млн долларгача бўлган иккита синдикатланган кредит ажратди, деб хабар қилди банк матбуот хизмати «Газета.uz»га.
Эслатиб ўтамиз, 2021 йил январь ойида Ўзбекистон ҳукумати ва Саудиянинг ACWA Power компанияси ўртасида Бухоро вилоятининг Пешкў ва Ғиждувон туманларида иккита шамол электр станцияси қуриш бўйича шартнома имзоланган эди. ACWA Power ушбу лойиҳаларни амалга ошириш учун иккита: Dzhankeldy Wind ва Bash Wind лойиҳа компанияларини ташкил этди.
ЕТТБнинг Bash Wind компанияси учун 277 млн долларгача бўлган кредити ЕТТБнинг 150 млн долларгача бўлган А кредити ҳамда тижорат банкларига синдикацияланадиган 127 млн долларгача бўлган В кредитидан иборат бўлади.
Ҳисоботда айтилишича, янги шамол станцияси йилига 1650 ГВт/соат электр энергияси ишлаб чиқаради ва карбонат ангидрид (CO2) чиқиндиларини йиллик 930 минг тоннага камайтиришга ёрдам беради.
Dzhankeldy Wind компаниясига ЕТТБнинг 243 млн долларлик кредити ЕТТБнинг 150 млн доллар миқдоридаги А кредитидан иборат бўлади, қолган 93 млн доллари эса тижорат банкларига синдикатланади.
Бу электр станцияси йилига 1550 ГВт/соат электр энергияси ишлаб чиқариши ва CО2 чиқиндиларини йиллик 890 минг тоннага камайтиришга ёрдам бериши кутилмоқда.
Иккала лойиҳа ҳам Deutsche Investitions und Entwicklungsgesellschaft (DEG), Proparco, Standard Chartered Bank ва тижорат банклари томонидан биргаликда молиялаштирилиши мумкин, дея қўшимча қилди ЕТТБ.
Ўзбекистонда қайта тикланадиган энергия манбаларини жойлаштириш режаси 2030 йилгача 12 ГВт қуёш ва шамол энергиясини яратишга қаратилган, деб эслатиб ўтди ЕТТБ.
