Бош вазир ўринбосари, энергетика вазири Жўрабек Мирзамаҳмудов Ўзбекистон аҳолини Россия ва Қозоғистон билан «газ иттифоқи»да ихтиёрий равишда иштирок этишга кўндириш мақсадида энергия ресурсларининг сунъий танқислигини яратаётгани ҳақидаги тахминларга изоҳ берди. Бу ҳақда Энергетика вазирлиги матбуот хизмати «Газета.uz»га маълум қилди.

«Таъкидлаш жоизки, бу [энергетика ресурслари танқислиги] қандайдир ташқи омиллар билан боғлиқ бўлмаган ҳолат. Бу ички истеъмолнинг ошиши, иқтисодиётнинг ўсиши, аҳоли сонининг кўпайиши, одамлар фаровонлиги ва даромадлари билан боғлиқ, шунинг учун ҳам энергия ресурсларига бўлган эҳтиёж ва талаб кескин ўсиб бормоқда. Шуни айтиб ўтиш керакки, биз бу эҳтиёжни етарли даражада ва етарли ҳажмда қоплай олмаганимиз учун айбдормиз», — деди у.

Энергетика вазирининг таъкидлашича, газга бўлган эҳтиёжни қоплаш учун импорт қилиш керак.

«Талабни қоплаш, ички истеъмолни таъминлаш ва муаммони ҳал қилиш мақсадида бугун биз газ ва электр энергиясини қандайдир альянс ёки иттифоқ орқали эмас, балки қўшни давлатлардан импорт қилиш бўйича музокаралар олиб бормоқдамиз. Бу ерда биз энергия тармоқларни кимгадир бериб юбориш билан эмас, балки тижорат шартномаси, олди-сотди шартномаси асосида ҳамкорлик қилиш учун миллий манфаатлардан келиб чиққан ҳолда музокаралар олиб бормоқдамиз», — деди Жўрабек Мирзамаҳмудов.

Ўзбекистон қайси давлатлардан электр энергиясини импорт қилади?

«Ҳозирги кунда биз электр энергиясини Туркманистондан импорт қиляпмиз, ёзги даврда Қирғизистон ва Тожикистондан импорт қиламиз. Ички истеъмолни таъминлаш учун Қозоғистон, Россия ва Туркманистондан эса нефть ва нефть маҳсулотларини импорт қиламиз. Қолган ресурслар ҳозирда Россиядан импорт қилинмаяпти», — деди вазир.

Ноябрь ойи охирида Россия президенти Владимир Путин Россия, Қозоғистон ва Ўзбекистоннинг «уч томонлама газ иттифоқи»ни тузишни таклиф қилгани маълум бўлди. Қозоғистон президенти Қасим-Жомарт Тоқаев бу таклифни кўриб чиқишга тайёрлигини ва Путин бу борада Шавкат Мирзиёевга қўнғироқ қилмоқчи эканини билдирди.

Кейинроқ Путин ва Мирзиёев телефон орқали мулоқот қилди, бироқ газ иттифоқи билан боғлиқ тафсилотлар маълум қилинмади.