Россия Украина портларидан дон ва озиқ-овқат маҳсулотларини хавфсиз ташиш бўйича келишувдаги иштирокини қайта тиклади, дея 2 ноябрь куни хабар берди Россия Мудофаа вазирлиги матбуот хизмати.
Эслатиб ўтамиз, Россия дон келишувидаги иштирокини 30 октябрь куни, Украина ҳарбийлари Буюк Британия мутахассислари кўмагида дон коридорини қўриқлашга жалб этилган Россия кемаларига ҳужум қилгани ҳақида баёнот бергани ҳолда, тўхтатган эди.
Россия Мудофаа вазирлигининг чоршанба кунги баёнотида, жумладан, шундай дейилади: «БМТнинг иштироки, шунингдек, Туркиянинг кўмаги билан Украина томонининг Қўшма мувофиқлаштирувчи марказга 2022 йил 1 ноябрь куни йўлланган гуманитар коридордан ва қишлоқ хўжалиги маҳсулотларини олиб чиқиш манфаатлари юзасидан танлаб олинган Украина портларидан Россияга қарши жанговар ҳаракатлар олиб бормаслик тўғрисидаги ёзма кафолат хатлари олинди».
«Россия Федерацияси қабул қилиб олинган кафолатлар айни вақт учун етарли, деб ҳисоблайди», — дейилади Россия Мудофаа вазирлиги баёнотида.
Дон келишуви қайта тиклангани ҳақида биринчи бўлиб Туркия президенти Ражаб Тоййиб Эрдўғон маълум қилди. У бу ҳақда Туркиядаги ҳукмрон партиянинг парламент фракцияси йиғилишида айтиб ўтди, дея хабар бермоқда Anadolu.
«РИА Новости»нинг қайд этишича, йиғилишдаги чиқиши охирида Эрдўғонга қоғозча узатилган, у қоғозчага қараб, Туркия ва Россия мудофаа вазирларининг телефон орқали музокараларига асосланиб, келишув қайта тикланганини эълон қилган.
«Менинг Путин билан кечаги музокараларим ва мудофаа вазиримизнинг Шойгу билан музокараларидан сўнг, яна бир янгилик: дон коридори, аввал режалаштирилганидек, соат 12:00 дан ўз фаолиятини қайта тиклайди», — дея Туркия раҳбарининг сўзларидан иқтибос келтирмоқда агентлик. Аввалроқ Россия президенти матбуот котиби Дмитрий Песков Эрдўғон ва Путиннинг суҳбати давомли ва бафуржа кечганини маълум қилганди.
Шундан сўнг Туркия президенти украиналик ҳамкасби Владимир Зеленский билан телефон орқали гаплашган. Суҳбат чоғи Эрдўғон «Украинанинг ҳудудий яхлитлиги ва суверенитетини тўлиқ тиклайдиган англашув асосидаги адолатли тинчлик» билан урушга якун ясаш учун дипломатик саъй-ҳаракатларни фаоллаштириш зарурлигини айтиб ўтган.
Суҳбат якунлангач, Украина раҳбари Twitter’да шундай хабар қолдирган: «Дон келишувини сақлаб қолишдаги фаол иштироки, Украинанинг суверенитети ва ҳудудий яхлитлигини қўллаб-қувватлашдаги мустаҳкам қўллови учун Туркия президентига миннатдорчилик билдирдим. Украиналик асирлар ва сиёсий тутқунларни алмашиш бўйича келгуси қадамларни гаплашиб олдик. Бу масалада ҳам Туркиянинг қўлловига таянамиз».
Владимир Зеленский кейинроқ ўз видеомурожаатида БМТ бош котиби Антониу Гуттериш ва Туркия президентининг принципиал ва таъсирчан позициясини алоҳида қайд этиб ўтди. «Россиянинг шантажи ҳеч бир самара бергани йўқ», — деди Украина президенти.
«Шу кунларда Украина қишлоқ хўжалиги маҳсулотлари ортилган кемалар ҳаракати, аввало Россиянинг дон келишувини йўқ қилишга қаратилган уринишларини қабул қилмаётган ҳамкорларнинг, айнан БМТ ва Туркиянинг принципиаллиги шарофати билан давом этди. Аммо дон коридорига ишончли ва узоқ муддатли ҳимоя зарур. Россия бизнинг озиқ-овқат экспортимизни йўққа чиқаришга қаратилган ҳар қадамга дунё қатъий жавоб беришини аниқ-тиниқ билиши лозим, бу ўн миллионлаб одамлар учун ҳаёт-мамот масаласидир», — деди Украина президенти.
