23 октябрь куни соат 17:03 да Мy Freighter маҳаллий юк ташувчи авиакомпаниясининг самолёти Тошкент халқаро аэропортига келиб қўнди. Uzbekistan airports матбуот хизматининг хабар беришича, самолёт анъанавий равишда сув аркаси билан кутиб олинди.
Jumbo Jet номи билан танилган ва 105 тонна сиғимга эга Boeing-747 Мy Freighter компаниясининг биринчи хусусий юк самолёти бўлди.
2019 йилда ташкил этилган компания шу пайтгача UzAirways компаниясидан ижарага олинган самолётларда юк рейсларини амалга ошириб келган.
Келтирилишича, яқин келажакда Мy Freighter яна бешта Boeing-747 юк самолётини сотиб олади, шунингдек, яқин беш йил ичида эса паркни 20 та юк самолётигача етказади.
Маълумот учун, 2022 йилда компания юк рейслари сони 410 тага етди. Мy Freighter Хитойнинг ўнта йирик шаҳрида ўз омборларига эга, юк йиғиш пунктлари Чехия, Люксембург, Германия, Франция, Италия ва Нидерландияда, шунингдек, БААда, Жанубий Кореяда, Россия, Бразилия ва Ветнамда жойлашган.
«Авиачайхана» telegram-каналида ёзилишича, келган мазкур самолёт 1985 йил 20 февралда General Electric GE CF6−50E2 тўрт двигателли Boeing 747−281 °F юк версиясидир. 37 йиллик хизмат давомида самолёт бир нечта эксплуататорларларни алмаштиришга муваффақ бўлди. У ўз хизматини Японияда бошлаган, кейинчалик АҚШ, Россия, Грузия, Арманистон, Молдова ва ниҳоят Ўзбекистонга етиб келди. «Тегишли техник хизмат кўрсатиш ва йиллар — самолёт учун кўрсаткич эмас», деб таъкидлаган канал.
