Тошкент шаҳрининг Яккасарой туманида 20 сентябрь куни соат 10:30 атрофида қурилиш чиқиндиларини ортиб кетаётган «HOWO ZZ3» русумли юк машинаси баҳорда очилган янги кўприк четига ағдарилди.
Машина кўприк тўсиғини бузиб, четида тўхтаб қолган. Натижада юклар ерга тўкилган.
Тошкент шаҳар Ички ишлар бош бошқармасининг хабар беришича, 1975 йилда туғилган В.А. кўприк устида бошқарувни йўқотган. У «чап қўл тирсак соҳаси эзилиб йиртилган жароҳати» билан касалхонага олиб борилган.
Ҳозирда ҳолат юзасидан терговга қадар текширув ўтказилмоқда.
Орадан вақт ўтиб пойтахт ҳокимлиги матбуот хизмати йўл таъмирлаш ишлари олиб борилаётгани сабабли воқеа содир бўлган жой — Қушбеги кўприги айланма йўлининг бир қисми (Кичик Ҳалқа автомобил йўли кўчасидан Сергели томонига йўналган қисми) 24 сентябрь соат 00:00 га қадар ёпилишини маълум қилди.
