Беларусь президенти Александр Лукашенко 15 сентябрь куни Шанхай ҳамкорлик ташкилоти бош котиби Чжан Мин билан учрашди.
Беларусь раҳбари ШҲТ бош котибига мамлакатнинг ушбу ташкилотда кузатувчи сифатидаги ролини ижобий баҳолагани учун миннатдорлик билдирди.
«Биз Шанхай ҳамкорлик ташкилоти билан 12 йилдан бери ҳамкорлик қилиб келмоқдамиз. Бизнинг Шанхай оиласига кузатувчи сифатида қўшилишимиз ўз-ўзидан ёки тасодифий эмас эди. Ўшанда Шанхай ҳамкорлик ташкилоти ҳали ёш эди, дунё тартибига мослашишга ҳаракат қилди. Ҳозирда эса унга сайёрамизнинг келажаги, сайёрамизнинг жуда таъсирли қутби сифатида қарашмоқда. Ўшанда бундай эмас эди, лекин ўша пайтда биз Шанхай ташкилоти билан ҳамкорликни ривожлантиришга қарор қилгандик. Бу бизнинг сиёсий, иқтисодий ва балки ҳарбий-сиёсий келажагимиз», — деди Александр Лукашенко.
«Шунинг учун ташкилотда кузатувчи сифатида фаолият юритар эканмиз, Шанхай оиласининг тўлақонли аъзоси бўлишимизнинг вақти келди, деб қарор қилдик. Бу йўлда бизни қўллаб-қувватлаганингизни ва қўллаб-қувватлашда давом этаётганингизни биламан ҳамда бунинг учун сиздан жуда миннатдормиз», — деди у.
Беларус президенти ШҲТ бош котибига шахсан ўз миннатдорчилигини ҳам билдирди.
«Сиз ҳар доим бизнинг сўровларимизга, менинг сўровларимга жавоб бердингиз. Охирги президентлик сайловларида ҳам қатнашдингиз. Белоруссияни кўриш, унга баҳо бериш имконингиз бўлди ва охирги президентлик сайловларида берилган баҳолар учун сиздан миннатдорман. Бу ШҲТ ҳам бизнинг мамлакатимиздан манфаатдор эканидан далолат беради», — деди Александр Лукашенко.
Эслатиб ўтамиз, июль ойида Беларус ШҲТга тўлақонли кириш учун ариза берган эди. Ўшанда Ўзбекистон ташқи ишлар вазири Владимир Норов ташкилот аъзолари мамлакат аризасини фаол ўрганаётганини маълум қилганди.
