Ўзбекистонда турар-жойга эҳтиёжи бор талабаларнинг 47 фоизи ётоқхоналар билан таъминланган. Бу ҳақда олий ва ўрта махсус таълим вазири Абдуқодир Тошқулов жума куни АОКАда бўлиб ўтган матбуот анжуманида маълум қилди.
«1991−2010 йилларда ётоқхона ўринлари сони камайса камайганки, кўпаймаган. 2010−2016 йилларда 2000 ўринли талабалар турар-жойи барпо этилган. Ҳозирги кунда битта талаба учун турар-жой қиймати 40−50 миллион сўм атрофида, яъни, масалан, 400 ўринли талабалар турар-жойи тахминан 20 млрд сўм атрофида бўлади. 2017−2022 йил якуни билан 56 минг ўринли талабалар турар-жойи бўляпти. Бу 2010−2016 йилга нисбатан 28 баробар кўп», — деди вазир.
Қайд этилишича, Ўзбекистонда 2016 йилда 77 та ОТМ бўлган бўлса айни кунда уларнинг сони 172 тага етган. Унда таҳсил олувчи талабалар эса 200 минг нафардан 800 минг нафарга етган.
«Талабалар турар-жойининг етишмаслик муаммоси олий таълим муассасалари, талабалар сонини кўпайтиргунга қадар ҳам кўп эди. Дунё олий таълим тизимини ўрганганимда бир нарсага гувоҳ бўлдим — талабаларни ётоқхона билан 100 фоиз таъминлаган бирорта давлат йўқ. Айни пайтда Ўзбекистондаги ОТМлар ётоқхонасида 91 минг талабага жой бор. ОТМларда ўқувчи 211 минг нафар талабанинг эса турар-жойга эҳтиёжи бор», — деди Абдуқодир Тошқулов.
Унинг сўзларига кўра, 211 мингдан 91 минг талаба турар-жой билан таъминланган бўлса, яна 120 минг талаба ижара асосида турар-жой топишга мажбур. Аввалроқ «Газета.уз» ушбу муаммога дуч келган талаба ва уларнинг ота-оналари билан суҳбатлашган эди. Мақолани қуйидаги ҳавола орқали ўқишингиз мумкин.
