Бош прокуратура ҳузуридаги Департаментнинг Сирдарёнинг Сардоба туман бўлими томонидан ўтказилган тезкор тадбирда, фуқаро Ф.Ш. бошқа бир фуқаро Ҳ.ни юқори лавозимда ишловчи танишлари ёрдамида Гулистон давлат университетига ўқишга киритиб қўйиш эвазига 10 000 АҚШ долларини олган вақтида ашёвий далиллар билан ушланган, дейилади департамент хабарида.
Худди шунга ўхшаш ҳолат Бухоро вилояти Олот туманда ҳам аниқланган. Ўтказилган тезкор тадбир давомида, фуқаролар Н.Ҳ. ва С.Б. фуқаро З.нинг қизини 800 доллар эвазига Бухоро тиббиёт техникумига ўқишга киритиб қўйишга келишиб, шундан 400 долларини олган вақтда текширувчилар томонидан қўлга олинган.
Бундан ташқари, ушбу фуқаролар З.нинг тўнғич қизини ҳам техникумга ўқишга киритиб қўйиш эвазига 500 АҚШ долларини олганлиги аниқланиб, 200 АҚШ долларини қайтарганликлари процессуал тартибда расмийлаштирилган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
