Навоий кон-металлургия комбинати (НКМК) инвестиция дастурини амалга ошириш учун халқаро банклар консорциумидан 1,2 млрд долларлик кредит жалб қилди, дея хабар берди комбинат матбуот хизмати.
Комбинатга беш йил муддатга кафолатсиз узоқ муддатли синдикатланган кредит берилди. Банклар консорциуми таркибига JP Morgan&Chase, Citi, Societe Generale, Credit Suisse, ICBC Standard, Halyk Bank ва Deutsche Bank кирди.
Ўтган йилнинг сентябр ойида Россиянинг ВТБ молиявий гуруҳи НКМКни молиялаштириш бўйича ҳамкорлик қилиш учун жами 1 млрд долларлик кредит линияси очишини эълон қилди, шундан сўнг томонлар тегишли келишувни имзолади.
НКМК 2017−2026 йилларда умумий қиймати 3 млрд доллардан ортиқ бўлган мавжуд ишлаб чиқариш қувватларини модернизация қилиш ва янгиларини қуриш бўйича 27 та лойиҳани амалга оширишни режалаштирган бўлиб, бу заводнинг ишлаб чиқариш қувватини 30 фоизгача кўпайтириш имконини беради.
Аввалроқ, «Spot» НКМКнинг 2021 йилдаги соф фойдаси 11,3 трлн сўмни ташкил этгани ҳақида ёзганди. Йиллик ишлаб чиқариш ҳажми эса 54,25 трлн сўмни ташкил қилиб, 2020 йилга нисбатан 10,3 фоизна ўсганди.
