18 июль куни Андижон вилоятидаги UzAuto Motors компаниясининг автомобиль заводида биринчи Chevrolet Tracker 2023 модели ишлаб чиқарилди, деб хабар берди «Газета.uz» мухбири.
«Ўзбекистонда биринчи марта кроссовер автомобилларининг янги модели тўлиқ циклда ишлаб чиқарила бошланди», — дейилади компаниянинг расмий релизида.
Tracker`нинг янги авлоди Ўзбекистонда 2021 йил январь ойида сотувга чиқарилганди. Автомобиль Хитойдан олиб кирилган. Ўтган йилнинг декабрь ойида автомобилнинг биринчи синов версияси Асакада чиқарилганди.
UzAuto Motors вакилларининг сўзларига кўра, автомобиль 30 августдан сотувга чиқарилади. Ҳозирча унинг нархи эълон қилинмади, бироқ, ишлаб чиқарувчи импорт автомобилдан анча арзонроқ бўлишига ваъда бермоқда. Биринчи босқичда Tracker 3 та асосий: LS, LT ва Premier комплектацияларда ишлаб чиқарилади.
Ўзбекистон, Хитой ва Бразилиядан кейин экспорт бозорларида энг талабгир, Бразилия, Мексика ва Филиппинда энг кўп сотиладиган кроссовер Chevrolet Tracker 2023 автомобилини ишлаб чиқаришни йўлга қўйган учинчи мамлакатга айланди, дейилади компания хабарида.
Автомобилни GM GEM (General Motors Global Emerging Markets) платформасида ишлаб чиқариш йўлга қўйилди. Бу Асака автомобиль заводини модернизация қилиш ва маҳаллий етказиб берувчи ҳамкорлар томонидан ишлаб чиқаришга йўналтирилган сармоялар туфайли амалга оширилди. Инвестицияларнинг умумий ҳажми 620 миллион доллардан ортиқ.
Бир дона кроссоверни ишлаб чиқаришга ўртача 3 кун сарфланди, унга ишлатилаётган эҳтиёт қисмларининг 48−50 фоизи эса маҳаллий корхоналар томонидан етказиб берилган. Компания йил якунига қадар 25 мингта, 2023 йилда эса 80 мингта Tracker машинасини сотувга чиқаришни режалаштирмоқда.
