Америкалик миллиардер Илон Маск Twitter ижтимоий тармоғини сотиб олиш бўйича 44 млрд долларлик келишувдан воз кечишга қарор қилди, деб хабар бермоқда BBC.
Илон Маскнинг адвокатлари ўз баёнотида Twitter`нинг платформадаги сохта ёки спам аккаунтлари ҳақидаги кўплаб сўровларга жавоб бермагани ёки жавоб беришдан бош тортгани, бу эса компаниянинг бизнес фаолиятига таъсир қилганини таъкидлади.
Адвокатларнинг сўзларига кўра, Twitter битим шартларини бузган ва Илон Маскни келишувга киришида чалғитувчи ва ёлғон баёнотлар берган.
Twitter келишув шартларини бажартириш учун Маскни судга бермоқчи. Жорий йилнинг апрель ойида эълон қилинган Маскнинг келишувдан чиққани ҳақидаги хабардан сўнг компания акциялари 6 фоизга арзонлашди.
«Twitter директорлар кенгаши жаноб Маск билан келишилган нарх ва шартлар бўйича битимни ёпиш ниятида ва бирлашиш келишувини амалга ошириш учун қонуний чоралар кўришни режалаштирмоқда. Биз Делавэрдаги судда ғалаба қозонишимизга ишончимиз комил», — деб ёзди Тейлор Twitter`да.
Аввалроқ, Маск ижтимоий тармоқ раҳбарияти унга сохта ва спам аккаунтлар Twitter фойдаланувчилари умумий сонининг 5 фоизидан камроғини ташкил этишини исботламаса, келишувдан воз кечиш билан таҳдид қилганди.
Июнь ойида регуляторга йўллаган расмий хатида Маск компания харидори сифатида Twitter`даги спам аккаунтлар сонини мустақил баҳолаш ҳуқуқига эга эканлигини таъкидлаган.
Маск томони Twitter мазкур йўл билан сотиш шартномаси шартларини бузганини даъво қилмоқда.
Twitter спам-аккаунтлар сони бўйича ўз ҳисоб-китоблари тўғри эканини қайд этди, бироқ Маскнинг сўзларига кўра, ижтимоий тармоқда сохта аккаунтлар кунлик фойдаланувчилар сонининг 5 фоиздан камроқлиги ҳақидаги расман эълон қилинган миқдордан анча кўп.
