25 апрель — душанба куни Илон Маск Twitter Inc (TWTR.N) компаниясини 44 млрд долларга сотиб олиш бўйича келишувга эришди. Бу ҳақда Reuters ахборот агентлиги хабар бермоқда.
«Бу билан миллионлаб фойдаланувчилар ва глобал лидерлар тўпланган ижтимоий медиа платформаси назорати дунёдаги энг бой одамга ўтади», — дейилади хабарда.
Ўтган ҳафта ноаниқ бўлиб кўринган келишув бўйича муҳокамалар ҳафта охирида Маск Twitter акциядорларини ўз таклифининг молиявий тафсилотлари билан қизиқтирганидан кейин тезлашгани айтилади.
У компаниянинг ҳар бир акциясини 54,20 долларга сотиб олишга келишган. Битим амалга ошиши учун Маск 25 млрд доллардан ортиқ кредит маблағларини жалб қилган.
Маълум бўлишича, янгиликдан сўнг Twitter акциялари 5,7 фоизга ошиб, 51,70 долларни ташкил қилди.
Шартнома Twitter`нинг 2013 йилдан бери давлат компанияси сифатидаги фаолиятини якунлайди ва хусусийлашади.
«Умид қиламанки, ҳатто менинг энг ёмон танқидчиларим ҳам Twitter`да қолишади, чунки айнан шу сўз эркинлигини англатади», — деб ёзган Маск ижтимоий тармоқни сотиб олиш ҳақида эълон қилишдан бироз олдин.
Twitter`нинг биржадаги қиймати рақобатчиларини ортда қолдирди. Фото: Reuters
Қолаверса, мазкур қарор ошкор қилингач Twitter акциялари нахри тахминан 6 фоизга ўсган.
Иқтисодчи Отабек Бакировнинг ёзишича, твиттернинг 1,3 млрд атрофида аккаунтлар бор, улардан 330 миллиони фаол ҳисобланади. Энг кўп фойдаланувчилар (80 млн атрофида) эса АҚШда.
«Эркин фикр шаклланадиган платформа ўлароқ твиттер қатор тоталитар давлатларда — Хитой. Россия, Эрон, Венесуэла ва сўз эркинлиги мавжуд деб эълон қилинган Ўзбекистонда блокланган. Қаттиқ цензура ўрнатилганига қарамай, Ислом Каримов даврида Ўзбекистонда твиттерга нисбатан чекловлар мавжуд бўлмаган», — дея қайд этди блогер.
Эслатиб ўтамиз, 2021 йил июль ойида «Ўзкомназорат» давлат инспекцияси «Шахсий маълумотлар тўғрисида»ги қонунни бузгани учун Twitter, TikTok, «ВКонтакте», WeChat ва Skype мессенжерига киришни чеклаган эди.
Ноябрь ойи бошида Telegram, Facebook, «Одноклассники», YouTube ва бошқа сайтлар ҳам қоидабузарлар реестрига киритилди. Бу жамоатчиликнинг норозилигига сабаб бўлди ва бир неча соатдан кейин кириш тикланди. «Ўзкомназорат» раҳбари лавозимидан озод этилди, бироз вақт ўтгач, АКТ вазирлиги раҳбари ва бош вазирнинг IT бўйича маслаҳатчиси ўз лавозимларини тарк этди. Бугунги кунга қадар TikTok, Twitter, «ВКонтакте», WeChat ва Skype`га кириш чекланганлигича қолаётганди.
Ҳозирча расмий идоралар томонидан бу ҳолатга изоҳ берилмади.
Ўзбекистонда TikTok, Twitter ва «ВКонтакте» ижтимоий тармоқлар фаолиятига чеклов қўйилганидан сўнг, VPN дастурига талаб бирданига ортганди. Сўнгги марта бундай ҳолат 2018 йилнинг кузида, Facebook ва YouTube блокланганида кузатилган эди.
Ҳозиргача Twitter ижтимоий таррмоғига фақатгина VPN (Virtual Private Network) орқали кириш мумкин эди.
Бундан олдин Ўзбекистонда Twitter фаолияти чекланганига қарамасдан, давлат органлари ва расмий шахслар, жумладан Сенат раҳбари Танзила Нарбаева ҳамда президент матбуот хизмати мазкур ижтимоий тармоқда постлар эълон қилишда давом этаётгани ҳақида хабар берилганди.
2022 йилнинг март ойи ўрталарига кетиб, Ўзбекистонда Twitter, TikTok ва «ВКонтакте» ижтимоий тармоқлари эркин очилишни бошлади. Шу билан бирга, улар кириш чекланган ижтимоий тармоқлар рўйхатидан чиқарилмаган. Ўшанда ҳам орадан сал вақт ўтиб, тармоққа кириш қийинлаша бошлади.
