Жаҳон соғлиқни сақлаш ташкилоти чоршанба кунги брифингда сўнгги икки ҳафта ичида коронавирус билан касалланганлар сони 30 фоизга ошганини эълон қилди.
Ташкилот бош директори Тедрос Гебрейесуснинг сўзларига кўра, АҚШ ва Европада омикрон штаммининг BA.4 ва BA.5 субвариантлари устунлик қилмоқда, айни пайтда янги кичик турлар ҳам аниқланмоқда.
Омикроннинг BA.2.75 кичик тури Ҳиндистонда аниқланган, мутахассислар уни кузатмоқда, деди ЖССТ раҳбари.
«Глобал миқёсда ўтказилган коронавирус тестлари сони кескин камайди, — деди Тедрос Гебреесус. — Бу коронавирус ривожланишининг ҳақиқий манзарасини яширади ва одамлар оғир кечишининг олдини олиш учун ўз вақтида даволанмаётганини билдиради».
Ҳозирги глобал коронавирус ҳолатини яна бир нечта тенденциялар характерлайди:
- эмлаш жиддий касаллик ва ўлимнинг олдини олишнинг ҳақиқатан ҳам самарали воситаси бўлиб қолмоқда. ЖССТ, айниқса, хавф гуруҳларида (тиббиёт ходимлари, кексалар, сурункали касалликларга чалинганлар) бустер вакцинациянинг аҳамиятини таъкидлайди;
- янги коронавирус дорилари, айниқса самарали антивирал препаратлар паст ва ўрта даромадли мамлакатларга етиб бормаяпти, шунинг учун ЖССТ мамлакатларни уларни янада қулайроқ қилишга чақирмоқда;
- пандемиянинг ҳар бир тўлқини касаллик оқибатлари билан яшайдиган кўпроқ одамларни қолдиради. Бу омон қолганларнинг ўзига таъсир қилади ҳамда соғлиқни сақлаш тизими, иқтисодиёт ва жамият учун қийинчилик туғдиради.
6 июль куни Ўзбекистонда 94 та касаллик қайд этилган бўлса, ўтган ҳафтада кунлик кўрсаткич 92−95 тани ташкил қилди.
Қозоғистонда эса 5 июль куни касалланишлар сони кескин ошгани қайд этилди: кунига 360 киши (бир кун аввал — 87). Россияда ҳар куни 4000 дан камроқ касаллик аниқланмоқда, бу кўрсаткич ҳозирча ўсаётгани йўқ, деб ёзади РБК
