Душанба куни кечқурун Брюсселдаги саммитда бўлиб ўтган дебатлар чоғида Европа Иттифоқи давлатлари ва ҳукуматлари етакчилари Россия нефтининг учдан икки қисмига эмбарго қўллаш бўйича келишувга эришишди, деб хабар берди Euronews.
Тақиқ фақат денгиз орқали юк ташишга таъсир қилади, қувур орқали импорт давом этади.
Россияга қарши санкцияларнинг олтинчи пакети, шунингдек, Сбербанкни SWIFT тизимидан узиб қўйиш ва яна учта Россия давлат оммавий ахборот воситаларининг ЕИда трансляциясини тақиқлашни ўз ичига олади, телеканаллар номи ҳозирча аниқлаштирилмади. Аввалроқ, Russia Today ва Sputnik каналларига нисбатан санкциялар жорий қилинганди.
ЕИ Кенгаши президенти Шарль Мишель ўзининг Twitter`даги саҳифасида келишув ҳақида эълон қилди ва бу «рус ҳарбий машинасини молиялаштиришнинг катта манбасини қисқартиришини» таъкидлади.
«Ушбу кўрилган чора Европа миқёсида импорт қилинадиган Россия нефтининг 75 фоизига, йил охирига келиб эса деярли 90 фоизга таъсир қилишини англатади», — деб ёзади у.
Тўлиқ эмбаргога Венгрия бош вазири Виктор Орбан қаршилик кўрсатди, чунки Венгрия денгизга чиқа олмайди ва нефтнинг 60 фоизидан ортиғини Россиядан «Дружба» қувури орқали сотиб олади.
Бундан ташқари, саммитнинг биринчи кунида Европа Иттифоқи ва унинг «Катта еттилик» бўйича ҳамкорлари Украинага грантлар ва имтиёзли кредитлар шаклида 9 млрд евро молиявий ёрдам беришга қарор қилишди.
