Венгриянинг ОТP Bank`и «Ипотека-банк»ни сотиб олишни тўхтатди, аммо унга бўлган қизиқишни сақлаб қолмоқда. Бу ҳақда банкнинг молиявий директори Ласло Бенчик маълум қилди, деб ёзади Spot.uz.
Инвесторлар билан биринчи чорак якунлари бўйича ўтказилган суҳбат чоғида Societe Generale вакили Ўзбекистондаги битим бекор қилинганми ёки ОТP Bank Украинадаги уруш билан боғлиқ вазиятнинг тинчланишини кутяптими, деган саволни берди.
Ласло Бенчик келишув «пауза»га қўйилганини таъкидлади, бироқ ОТP Ўзбекистон томонига қизиқиш сақланиб қолаётганини маълум қилди. Топ-менежернинг сўзларига кўра, Венгрия банки «Россия ва Украинадаги вазият қандай ривожланаётганини кўрмагунча, ўз мажбуриятларини зиммасига олишга тайёр эмас».
«Сотувчининг бизни кутишга қонуний мажбурияти йўқлиги аниқ. Шунинг учун агар улар сотишга қарор қилсалар — сотишаверсин. Аммо улар кутишса, биринчи навбатда Украинада вазият яхшиланса, биз бунга [масалага] қайтмоқчимиз. Демак, биз ҳали ҳам салоҳиятни кўрмоқдамиз», — дея қўшимча қилди у.
Ўзбекистон бозорига кириш ОТP учун қулайлик зонасидан чиқиш бўлади, деб ҳисоблайди Бенчик. Унинг сўзларига кўра, бу банк географиясининг аввалги кенгайишига қараганда анча жиддийроқ қадам ҳисобланади.
Ҳозирда ОТP Ўзбекистонда бўлмаган яна учта банк билан музокаралар олиб бормоқда.
«Мен таъкидлаганимдек, биз иштаҳамизни йўқотмадик, — деди Бенчик. — Агар бирон-бир қизиқроқ нарса пайдо бўлса, биз уни кўриб чиқамиз».
Апрель ойида ОТP Bank Ўзбекистондан «Ипотека-банк»нинг 75 фоиз давлат улушини сотиб олишни 2−3 ойгача кечиктиришни сўрагани маълум бўлди. Кечикиш сабаби Украинадаги уруш туфайли юзага келган ноаниқликдир.
OTP Group («Группа OTP», BSE: OTP, LSE: OTPD) — молия, суғурта, инвестиция ва банк бизнеси билан шуғулланувчи Венгрия банк гуруҳи бўлиб — активлар ва лизингни бошқаришдан тортиб, пенсияларни молиялаштиришгача бўлган соҳаларда фаолият юритади.
