Венгриянинг ОТP Bank Ўзбекистонга «Ипотека-банк»нинг 75 фоиз давлат улушини сотиб олиш бўйича битимни 2−3 ойга кечиктириш илтимоси билан мурожаат қилди. Бу ҳақда Bloomberg агентлигига OTP Bank Group директорлар кенгаши раиси ва бош директори Шандор Чаньи маълум қилди.
У илк бор сентябрь ойида эълон қилинган келишувнинг кечикишига Украинадаги уруш боис вужудга келган ноаниқликни сабаб қилиб кўрсатди.
«Украинада уруш бошланганда харид имзолашга тайёр эди», — деди Шандор Чаньи. Шу муносабат билан у келишувни вазиятга ойдинлик киритилгунича қолдиришни сўраган.
Венгриянинг «ОТP Bank"и Ўзбекистон бозорига кириб келиши 2020 йилнинг июлидаёқ маълум бўлган эди. Бу ҳақда Венгрия ташқи ишлар ва савдо вазири Петер Сияртонинг Тошкентга ташрифи чоғида сўз очилган эди. Жорий йилнинг февралида «ОТP Bank» Ўзбекистондаги банклардан бирини хусусийлаштириш жараёнида қатнашиши хабар қилинган эди.
2019 йилнинг июнь ойида «Ипотека-банк»нинг устав капиталидаги давлат улуши 2022 йилнинг якунига қадар 50 фоиздан камроқ бўлиши кутилаётгани таъкидланганди. Банк Халқаро молия корпорацияси иштирокида хусусийлаштирилиши ва трансформация қилиниши кўзда тутилган.
OTP Group («Группа OTP», BSE: OTP, LSE: OTPD) — молия, суғурта, инвестиция ва банк бизнеси билан шуғулланувчи банк гуруҳи — активлар ва лизингни бошқаришдан тортиб, пенсияларни молиялаштиришгача бўлган соҳаларда фаолият юритади.
