8 апрель куни Украинанинг Закарпатська вилояти ҳарбий маъмуриятининг Европа гуманитар хабларининг бирига Ўзбекистондан 34 тоннадан ортиқ гуманитар ёрдам етиб келган. Бу ҳақда Закарпатська вилоят раҳбари Виктор Микита маълум қилди.


Фото: Закарпатська вилояти ҳарбий маъмурияти матбуот хизмати.

Вилоят раҳбарининг сўзларига кўра, Ўзбекистондан дори-дармон, индивидуал дори қутилари, узоқ муддат сақланадиган озиқ-овқат маҳсулотлари, жами 400 минг донадан ортиқ бўлган 21 та позициядаги маҳсулот етиб келган.

«Юк самолётда етиб келди, кейин эса Закарпатськага етказилди. Бу биз қисқа вақт ичида ҳарбий ҳолат шароитида йўлга қўйган логистика самарадорлигини яна бир бор исботлайди. Гуманитар ёрдам зудлик билан зарур нуқталарга жўнатилади», — дея таъкидлаган вилоят раҳбари.

Виктор Микита Ўзбекистон ҳукуматига кўрсатган ёрдами ва Украинанинг Ўзбекистондаги фавқулодда ва мухтор элчиси Николай Дорошенкога мувофиқлаштириш ва самарали гуманитар йўлак учун миннатдорчилик билдирган. «Ишончим комилки, бу алоқалар бизга янада самарали ҳамкорлик қилиш имконини беради», — деган Закарпатська раҳбари.

Ўзбекистондан Украинага юборилган гуманитар ёрдам ҳақидаги маълумот ҳали ҳам Вазирлар Маҳкамасининг ёки Ташқи ишлар вазирлигининг веб-сайти ва бошқа ижтимоий тармоқларида ёритилмади.

Аввалроқ Украинанинг Тошкентдаги элчиси Ўзбекистонга 28 тонна инсонпарварлик ёрдами жўнатгани учун миннатдорчилик билдирган эди.

Бундан ташқари, Ташқи ишлар вазири Абдулазиз Камилов 17 март куни Олий Мажлис Сенатининг 24-ялпи мажлисида «биз Украинага гуманитар ёрдам беришда давом этамиз», деган эди. Шунингдек вазир, «Ўзбекистон Республикаси Украинанинг мустақиллиги, суверенитети ва ҳудудий яхлитлигини тан олади. Биз Луганск ва Донецк халқ республикаларини тан олмадик», — деган эди.