Россиянинг «АвтоВАЗ» автомобиль ишлаб чиқарувчиси 16 мартдан Lada автомобиллари нархларини бир ой ичида иккинчи марта янгилади. 1 март куни янгиланган нархларга келсак, олтита асосий моделлар нархлари ўртача 8 фоизга ошган, деб ёзади ТАСС.
1 март куни «АвтоВАЗ» Lada нархини ўртача 15,4 фоизга оширганди. Нархлар 24 февралда бошланган Россия ҳарбийларининг Украинадаги операцияси фонида кўтарилди, шу сабабли хорижий концернлар Россияга автомобиль етказиб беришдан бош торта бошлади. Таъминот билан боғлиқ муаммолар ва бутловчи қисмларнинг етишмаслиги туфайли «АвтоВАЗ» ўз ходимларининг бир қисмига апрель ойида 20 кунлик таътил беради.
Март ойи бошида «Газета.uz» Ўзбекистонда Lada автомобиллари нархи ошгани ҳақида хабар берган эди. Ўша пайтда автомобиллар нархи, компания қайд этганидек, 2−5 млн сўмга қимматлашган.
Компания расмий сайтидаги амалдаги нархлар рўйхатига кўра, 16 март куни нархлар яна кўтарилган. Ҳозирда бошланғич нархлар қуйидагича кўриниш олди:
- Vesta — 170,9 млн сўмдан бошланади (+6,2 фоиз ёки 10 млн сўмга ошган);
- Xray Cross — 178,9 млн сўмдан (+4% ёки 7 млн сўм);
- Largus — 172,9 млн сўмдан (+6,1% ёки 10 млн сўм);
- Niva Legend — 162,9 млн сўмдан (+6,5 фоиз ёки 10 млн сўм);
- Niva Travel — 214,9 млн сўмдан (+4,8 фоиз ёки 10 млн сўм).
2021 йил сентябрь ойида ADM Jizzakh’да Lada автомобилларини cериали йиғиш йўлга қўйилди. SKD усулида ишлаб чиқарилган биринчи моделлар Lada Vesta SW ва Lada Xray эди. Roodell компанияси Lada автомобилларининг Ўзбекистондаги расмий импортчиси ҳисобланади. 2020 йилда компаниянинг дилерлик тармоғи орқали 5000 дан ортиқ Lada автомобиллари сотилган.
