Украина президенти Владимир Зеленский Европа иттифоқига аъзо бўлиш учун аризани имзолади.
«Бугун Европа иттифоқига аъзо бўлиш учун аризани имзоладим. Бунинг ҳақиқат эканига ишончим комил», — деб ёзди у ўзининг Telegram-каналида.
Ҳужжатнинг сурати Олий Раданинг Telegram-каналида эълон қилинди. Ариза Европа Кенгаши, Европарламент раҳбарлари ҳамда Европа Иттифоқига раислик қилаётган Франция президенти Эммануэл Макрон номига йўлланган.
Бир кун аввал, 27 февраль куни Еврокомиссия президенти Урсула фон дер Ляйен ЕИ давлатлари Украинани Европа оиласида кўришни истаётганларини айтганди.
«Вақт ўтиб, Украина ЕИга қўшилиши керак, бу мамлакат биздан бири ва биз уни Европа оиласида кўришни хоҳлаймиз», — деди фон дер Ляйен.
26 февраль куни Украина раҳбари ЕИ президенти Шарл Мишель билан музокаралар чоғида мамлакатнинг Европа Иттифоқига қўшилиши масаласини кўтарди. «Узоқ муддатли мунозарани бир мартада ва бутунлайига ёпиш ҳамда Украинанинг Европа Иттифоқига аъзолиги тўғрисида қарор қабул қилиш учун ҳал қилувчи вақт келди», — деди у суҳбатдан сўнг.
РБК маълумотларига кўра, 2014 йилда Украина ва ЕИ ўртасида Ассоциация тўғрисидаги битим имзоланган. Ушбу ҳужжатнинг имзоланиши Евромайдоннинг вужудга келиш сабабларидан бири бўлиб, можаро президент Виктор Януковичнинг ағдарилиши билан якунланган эди. 2019 йилда амалдаги президент Пётр Порошенко мамлакатнинг 2024 йилда Европа Иттифоқига аъзо бўлиш учун ариза топшириш режаларини эълон қилди.
