БМТ Бош котиби Aнтониу Гутерриш 23 феврал, чоршанба куни БМТ Хавфсизлик кенгаши йиғилишида Россия президенти Владимир Путинга мурожаат қилиб, «Россия қўшинларини Украина чегараларидан олиб чиқиб кетиш» ва тинчлик ўрнатиш имкониятини бериш илтимоси билан мурожаат қилган. Бош котиб мурожаати ташкилотнинг YouTube-каналида тўғридан-тўғри трансляция қилинди.
«Мен бир нарсани чин юракдан айтмоқчиман: президент Путин, ўз ҳарбийларингизни Украинага ҳужумдан тўхтатинг, тинчликка имкон беринг. Шундоқ ҳам кўплаб инсонлар ҳалок бўлишди», — деган бош котиб.
Россия президенти Владимир Путин 24 февраль куни эрталаб миллатга телемурожаатида Донбасс ҳудудида «махсус ҳарбий операция» бошланганини эълон қилди.
Путиннинг мурожаати тугаши биланоқ, Киев, Харьковь, Мариуполь, Одесса ва Украинанинг бошқа шаҳарларида портлашлар бошланди, дея хабар берди УНИАН ахборот агентлиги. Донбассдаги сепаратистлар томонидан ҳам отишмалар бошланди.
Олдинроқ ўзини мустақил деб эълон қилган Донецк ва Луганск халқ республикалари Владимир Путинга Украина қуролли кучларининг агрессиясига жавоб қайтаришда ёрдам бериш учун мурожаат қилган эди. 21 февраль куни Россия президенти ДНР ва ЛНР мустақиллигини тан олди.
24 февраль куни кечаси Украина президенти Владимир Зеленский россияликларга мурожаат билан чиқди. У РФ президенти билан мулоқот қилиш бўйича ташаббус билан чиққанини, лекин жавоб олмаганини маълум қилди. «Сизларга бу олов Украина халқига озодлик олиб келади дейишяпти. Лекин украин халқи озод. Ўтмиш унинг ёдида ва келажагини ўзи қурмоқда. Қуряпти, сизларга телевизорда ҳар куни айтишаётгандек, барбод қилаётгани йўқ».
Шунингдек, Зеленский «Сизларнинг янгиликларингиздаги Украина ва реал ҳаётдаги Украина — бу иккита мутлақ бошқа-бошқа давлатлар» эканлигини таъкидлаб, Украинанинг асосий мақсади ўз фуқароларининг тинчлигини таъминлаш ва уларни ҳимоя қилиш эканлигини қайд этди.
