Республика махсус комиссиясининг навбатдаги йиғилишида иш берувчилар ўз ходимларининг коронавирусга қарши эмланиши ва бустер доза олишига масъул бўлиши таъкидланди. Бу ҳақда «Газета.uz» мухбири хабар берди.
Унга кўра, иш берувчиларга қўл остидаги ишчи-хизматчиларнинг коронавирус инфекциясига қарши эмланганлик, шу жумладан, бустер доза билан эмланиш даражаси 90 фоиздан кам бўлмаслигига эришиш мажбурияти юклатилди.
Махсус комиссия қарорига кўра, давлат органлари, хўжалик юритувчи субъектлар ва бошқа ташкилотлар ходимларининг коронавирус инфекциясига қарши, шу жумладан, бустер доза билан эмланмаганлиги аниқланганда, улар вақтинчалик ишдан четлаштирилади.
Ходим коронавирус инфекциясига қарши бустер доза билан эмланишни рад этганда, иш берувчи томонидан унинг вақтинча ишдан четлаштирилишини Санитария-эпидемиологик осойишталик ва жамоат саломатлиги хизмати қатъий назоратга олади.
2021 йилнинг август ойида Меҳнат кодексининг 113-моддасига ходим карантинли ва юқумли касалликлар таҳдиди бўлганда Бош давлат санитария врачи қарори асосида профилактик эмлашдан ўтишни рад этса (қарши кўрсатма мавжуд бўлмаганда) иш берувчи уни ишга қўймасликка ҳақли эканлигига оид кўшимча киритилган эди.
Олдинроқ, 1 мартдан бошлаб Ўзбекистонда ниқоб тақиш мажбурияти бекор қилингани ҳақида хабар берилганди.
