Жо Байден Россия Украинага ҳужум қилмаса, Путин билан учрашишга рози бўлди
АҚШ президенти Жо Байден Россиянинг Украина «босқин» қилмаса, Владимир Путин билан учрашишга тайёр. Бу ҳақда Оқ уй матбуот котиби Жен Псакига таяниб ТАСС хабар берди.
«Президент кўп маротаба аниқ таъкидлаганидек, биз босқин бошлангунга қадар дипломатик ҳамкорликка содиқмиз. Давлат котиби [АҚШ, Энтони] Блинкен ва [Россия Федерацияси] ташқи ишлар вазири Сергей Лавров агар Россия ҳарбий ҳаракатларни амалга оширмаса, шу ҳафта охирида Европада учрашади», — дейилади ҳужжатда.
«Президент Байден бу алоқалардан сўнг, агар босқин бўлмаса, президент Путин билан яна учрашишга принципиал рози бўлди. Биз дипломатияга доим тайёрмиз», — дейилади хабарда.
Японияда мамлакатдаги илк водород поезди синовдан ўтказилди
Япониянинг энг йирик темир йўл компанияси март ойида водород ёнилғи поездини синовдан ўтказишни бошлайди. Бу ҳақда Bloomberg хабар берди. Икки вагонли Hybari поездини ишлаб чиқиш учун тахминан 35 млн доллар сарфланган. Поезд водородни бир марта тўлдиришда 100 км/соат максимал тезликда 140 километр масофани босиб ўта олиши маълум қилинди.
Япония ҳукумати 2050 йилга келиб водороддан фойдаланиш ҳажмини 20 млн тоннага оширишни мақсад қилган. Бир нечта энергетика компаниялари водород нархини пасайтириш учун етказиб бериш занжирларини қуришга ҳаракат қилмоқда. Германия 2018 йилдаёқ Alstom SA томонидан қурилган дунёдаги биринчи водород поездини ишга туширган эди. Siemens AG ва Deutsche Bahn AG янги минтақавий поездлар ва махсус ёнилғи қуйиш шохобчаларини ишлаб чиқаётгани айтилди. Компаниялар уларни 2024 йилда синовдан ўтказади.
Озарбайжон Арманистоннинг собиқ президентлари Кочарян ва Саргсянга қидирув эълон қилди
Озарбайжон Арманистоннинг собиқ президентлари Роберт Кочарян ва Серж Саргсянни қидирувга берди. Бу ҳақда Коммерсантъ хабар қилди.
Хабарга кўра, 1988 йилнинг февраль ойидан бошлаб Арманистоннинг собиқ президентлари «озарбайжон ва арман халқлари ўртасида миллий адоват қўзғатиш мақсадида шаҳардаги ташкилот ва муассасаларда миллати арман бўлган ходимлар иштирокида йиғилишлар ўтказган.
Улар Қорабоғда озарбайжонликларни камситганликда айбланмоқда. Арманистон ва Озарбайжон Россия иштирокида 2020 йил ноябрида Қорабоғ урушини тугатишга келишиб олди. 2021 йилнинг декабрида Пашинян Озарбайжон билан тинчлик шартномаси бўйича музокараларни бошлашга тайёрлиги ҳақида гапирган эди. Арманистон ва Озарбайжон чегарасида можаронинг авж олиши январь ойида қайта бошланган.
ДХР ва ЛХР Россиядан республикаларнинг мустақиллигини тан олишини сўради
Донецк ва Луганск халқ республикалари раҳбарлари Денис Пушилин ва Леонид Пасечник Россия президенти Владимир Путинга республикалар мустақиллигини тан олиш илтимоси билан мурожаат қилди, деб хабар берди РИА Новости.
Денис Пушилин таъкидлаганидек, Украина ҳукумати можарони куч билан ҳал қилишга қарор қилди. Мустақилликни тан олишдан ташқари, ДХР ва ЛХР раҳбарлари Россия президентидан мудофаа соҳасида ўзаро ҳамкорлик тўғрисида битим тузиш имкониятини кўриб чиқишни сўрашди.
21 февраль куни Россия жанубий ҳарбий округи матбуот хизмати «россиялик ҳарбийлар ва чегарачилар бир гуруҳ диверсантларнинг Украина ҳудудидан давлат чегарасини бузишининг олдини олгани» ҳақида хабар берди.
Жанубий ҳарбий округ маълумотларига кўра, воқеа эрталаб соат 6:00 атрофида Ростов вилоятининг Митякинская қишлоғи яқинида содир бўлган. Ҳарбийларнинг таъкидлашича, Украина Қуролли кучларининг иккита пиёда жанговар машинаси Россия ҳудудига диверсантларни эвакуация қилиш учун кириб келган. Иккала БМП ҳам йўқ қилингани айтилмоқда. Гуруҳнинг беш нафар аъзоси ҳалок бўлган, россиялик ҳарбийлар орасида қурбонлар йўқ. Маълумотни мамлакат Федерал хавфсизлик хизматининг Жамоатчилик билан алоқалар маркази ҳам тасдиқлади.
Украина ташқи ишлар вазири Дмитрий Кулеба Twitter’да бу хабарларни қатъиян рад этди.
«Украина Донецк, Луганскка ҳужум қилмади, чегарадан диверсантлар ёки бронетранспортёрларни юбормади, Россия Федерацияси ҳудуди ёки чегарадаги назорат-ўтказиш пунктида ўт очмади, қўпорувчилик қилмади. У бундай ҳаракатларни режалаштирмайди «, — деб ёзди у.
ТИВ раҳбари Россиядан «сохта хабарларни зудлик билан тўхтатишни» талаб қилди.
1 мартдан COVID-19'га қарши эмланмаганлар Исроилга киришига рухсат берилади
1 мартдан бошлаб барча ёшдаги эмланмаган сайёҳлар Исроилга коронавирус учун иккита ПЦР тестини топшириш орқали келишлари мумкин, деб хабар берди РБК.
Бош вазир Нафтали Беннет нашрлардан бирига берган интервьюсида: «Биз касалланиш ҳақидаги маълумотларнинг доимий равишда камайиб бораётганини кўрмоқдамиз, шунинг учун аста-секин қайта очиш вақти келди».
Мамлакатга кириш учун эмланмаганлар Исроилга учишдан олдин, кейин эса мамлакатга келганидан сўнг ПЦР тестидан ўтишлари керак. Исроил коронавируснинг омикрон штамми пайдо бўлганидан кейин ўз чегараларини ёпган дунёдаги дастлабки давлатлардан бири бўлганди. Мамлакатда тўлқиннинг энг юқори чўққисида кунига 200 мингдан ортиқ ҳолат аниқланди. 20 февраль ҳолатига кўра, мамлакатда янги касалланишлар сони 10354 тани ташкил этмоқда.
