Тошкент ҳокими Жаҳонгир Ортиқхўжаев 16 февраль куни пойтахтдаги Алишер Навоий реконструкциясига бағишланган матбуот анжуманида (видео) қисқа, лекин очиқча нутқ билан чиқиш қилди. Тадбир «Газета.uz»нинг кўчани шоссега айлантирилаётганлиги ҳақидаги мақоласидан кейин ташкил этилди.
Шаҳар раҳбари тадбирда иштирок этмади. У аввал ишлаган компаниялари шаҳарда амалга оширилаётган лойиҳаларда ҳомийлик қилаётганлиги тўғрисидаги масалага ойдинлик киритиш учун «беш минутга» кирганини айтди. Ушбу масала бир кун олдин (ҳоким Космонавтлар майдони ҳомийлар маблағлари эвазига реконструкция қилинаётганлиги ҳақида айтган эди) ва матбуот анжуманида ҳам кўтарилган эди. Матбуот анжуманида Навоий ва Лабзак кўчаларининг кесишмаси ҳомийлик маблағлари ҳисобига пилот лойиҳа доирасида реконструкция қилиниши айтилди.
Сўзининг бошида Жаҳонгир Ортиқхўжаев ҳеч қачон сиёсатчи бўлмаганлигини, катта компаниялар раҳбари бўлганлигини эслатди.
«Хоҳлайсизларми, хоҳламайсизларми, менинг тарихим ишлаб чиқаришга тўғридан-тўғри боғлиқ. Умрим бўйича сиёсатда ишламаганман. Ҳомийлик масаласига келсак, мен мана шу юртнинг фарзандиман… 3,5 йиллик фаолиятимда олдинги ишлаган компаниям кўп ёрдам берди, ҳомийлик қилиб келди», — деди у.
Жаҳонгир Ортиқхўжаев ҳомийлик ишлари ҳақида гапириб, исломга кўра, «савоб» иш қилинганда у ҳақда айтмаслик керак деб ҳисоблашини, бунинг мукофотини кейинги дунёда олинишини айтди. «Агар бу дунёда қилган ишларингни мана бу ишни қиляпман, бу шаҳарга ёрдам беряпман деб айтсанг, бу савоб бўлмайди, риё бўлади», — деди ҳоким.
«Шунинг учун бугунгача айтмадик. Лекин кўпчилик бугун суриштирди. Мен ишлаган компания, сизлар биласизлар, Akfa ва Artel кўп нарсалардан воз кечаяпти. Яъни ишлаб чиқаришни олиб қолади, қолган магазин, супермаркет, гипермаркет — буларнинг ҳаммасини сотишга қарор қилди. Бу йил ҳам Ecobozor`ни сотди. Сотилган пулларнинг ярмига банклардан қарзини узди, ярмини шаҳарга ҳомийлик сифатида бермоқчи», — деди у.
Ҳоким Akfa Medline (таъсисчиларидан бири унинг рафиқаси) компанияси ҳам 2021 йилда юрак нуқсони билан туғилган болаларга 75 та бепул операция қилиб берганлигини таъкидлаб, 2022 йилда яна шундай 200 та операция қилинишини айтди.
«Айтмоқча эмас эдим, айтишга мажбур бўлдим», — деди Жаҳонгир Ортиқхўжаев.
Шаҳар ҳокими Akfa ва Artel компаниялари унга ҳокимиятга қандай ёрдам кераклигини сўраб, мурожаат қилган.
«Ҳозир улар ўз мол-мулкларини сотяпти, ярмини банкдаги кредитларидан қутилишга беряпти, ярмини шаҳарда парклар, аллеялар, перекресткаларга, операциялар, камбағалларга уйларининг томини ёпиш, кичкина маҳаллаларни асфальт қилишкаби ишларга йўналтиряпти», — деди у.
Ҳоким жорий йилнинг олти ойи давомида ушбу компаниялар 80 млрд сўмлик ҳомийлик ёрдамини кўрсатишини маълум қилди.
«Шунга асосланиб уларга ўз илтимосларимни қиляпман. Мен бошқа ҳеч нарса деёлмайман. Мен чарчадим. 3,5 йил ишлаган бўлсам, давлатнинг бир сўм пулига ҳам хиёнат қилганим йўқ. Олдимдан қўшган бўлсам қўшдим, топганимни бердим, бир сўм пул олганим йўқ», — дея таъкидлади у.
Ҳоким шунингдек лавозимга киришишидан олдин 35 та машинаси бўлганлигини қайд этди: «Жуда яхши кўраман машинани, ҳозир 6 та қолди. Яна яқинда битта машинамни аукционга қўяман ва сотилган пулидан яна юрагида нуқсони бор болаларни операция қилдирамиз».
«Агар булар гуноҳ бўлса, мен розиман. Агар булар гуноҳ, йўқ ишлатмаларингиз дейдиган бўлсаларингиз, унга ҳам розиман. Бугунгача давлатнинг бир сўмига ҳам хиёнат қилмаганман. Лекин менинг айбим — қилган нарсаларни айтиб туриш керак экан. Айтмаганим гуноҳ», — деди шаҳар ҳокими.
Жаҳонгир Ортиқхўжаев ўз вақтида уйсиз одамларга Сергели туманидан 400 та квартира совға қилинганлигини, ҳозир эса бу ҳақда ҳеч кимга айтмаганлиги ҳақида афсусланишини қайд этди.
«Лекин ишонинглар, халқнинг бирорта пулини чўнтагимга тиққаним йўқ. Борим шу», — деди у ва хонани тарк этди.
