Украина президенти Владимир Зеленский мамлакат аҳолисига мурожаатида 2022 йилнинг 16 февраль кунини Бирлик куни деб эълон қилди.
«Бизни катта уруш билан қўрқитишмоқда ва нечанчи бор ҳарбий босқин санасини белгилашмоқда», — деди Владимир Зеленский.
«Бизга қарши тизимли уруш барча фронтларда олиб борилмоқда. Ҳарбий фронтда — чегаралар атрофида контингент сони оширилмоқда. Дипломатик фронтда ўз ташқи сиёсий йўналишимизни мустақил белгилаш ҳуқуқимиздан маҳрум қилишмоқчи. Энергетикада — бизни газ, электр энергияси ва кўмир етказиб беришда чеклашмоқчи. Ахборот фронтида оммавий ахборот воситалари орқали фуқаролар ва инвесторлар орасида ваҳима ёйишга уринишмоқда. Аммо бугун давлатимиз ҳар қачонгидан-да кучлидир», — дея таъкидлаган президент.
Зеленский ҳукумат бошқа давлат армияси чегаранинг айнан қаерида тургани, унинг сони, жойлашуви, таъминоти ва режалари ҳақида ахборотга эгалигини айтиб ишонтирди. Украина ҳимояси билан унинг Қуролли кучлари ва дипломатияси шуғулланмоқда, деб қўшимча қилди у. Владимир Зеленскийнинг таъкидлашича, Украина тинчликка интилади ва барча масалаларни фақатгина тинч йўл билан ҳал этиш тарафдоридир.
Президент ўз нутқида шунингдек, йирик капиталга эга бўлган шахслар «ўз давлатидан аллақачон қочиб кетишганини» қайд этди.
«[Украинани] энг масъулиятли вақтда тарк этганларга мурожаат қилмоқчиман. Сизнинг кучингиз сиз эга маблағлар ва самолётларда эмас, балки намоён этишингиз мумкин бўлган фуқаролик позициянгизда. Ўз мамлакатингиз ва ўз халқингиз ёнига қайтинг, ахир сиз улар туфайлигина ўз заводларингиз ва давлатингизга эга бўлгандингиз. Бугун ҳар бир шахс Украина фуқаролигига синовдан ўтмоқда. Ундан муносиб ўтинг. Украина ким учун ҳақиқатан Ватан эканлигию, ким учун — шунчаки пул учун майдонлигини ҳамма англаб олсин», — дея даъват қилди президент.
Зеленский мамлакатни тарк этган ёки тарк этишни режалаштираётган давлат вакиллари: давлат хизматчилари ва депутатларга алоҳида мурожаат қилди.
«Украина халқи сизга нафақат давлат бошқаруви, балки унинг муҳофазасини ҳам ишониб топширган. Ҳозирги вазиятда сизнинг бевосита мажбуриятингиз — биз билан, украин халқи билан бирга бўлиш. Мен ҳозир сизларга 24 соат ичида Ватанга қайтишни ва украин армияси, дипломатияси ва халқи билан елкама-елка туришни таклиф этаман» — дея даъват қилган Владимир Зеленский.
«Бизга 16 февраль ҳужум уюштириладиган кун бўлишини айтишмоқда. Биз уни Бирлик кунига айлантирамиз, — деб баёнот қилди Украина президенти. — Тегишли қарор аллақачон имзоланди. Ушбу кунда биз миллий байроқларни иламиз, кўк-сариқ тасмаларни тақиб, бутун дунёга бизнинг бирлигимизни кўрсатамиз».
Фармонга кўра, 16 февраль куни бутун мамлакатдаги биноларда Украина давлат байроғи кўтарилади, соат 10:00да эса давлат мадҳияси янграйди, деб хабар берди мамлакат президенти матбуот хизмати.
Аҳолини кундалик хавфсизлик ҳолати ва давлатнинг мудофаа қобилиятини мустаҳкамлаш борасида қабул қилинаётган чоралар ҳақида хабардор этиб бориш учун ягона «UАразом» платформаси ташкил этилади.
Ҳукуматга ҳудудий мудофаа тизимини яратиш ва ишга тушириш ва фуқароларни миллий қарама-қаршиликка тайёрлаш ишларини жадаллаштириш топшириғи берилган.
Мансабдор шахслар, фармонга мувофиқ, 16 февраль куни иш жойида бўлишлари ва қасамёдга мувофиқ ўз мажбуриятларини бажаришлари лозим, акс ҳолда уларга нисбатан санкциялар қўлланилади.
Эслатиб ўтамиз, АҚШ президенти Жо Байден, 10 февраль куни NBC News эфиридаги чиқишида, Россия томонидан мамлакат ҳудудига амалга оширилиши мумкин бўлган эҳтимолий босқин сабабли, Украинада бўлиб турган америкаликлар зудлик билан мамлакатни тарк этишлари кераклиги ҳақида огоҳлантирган эди.
«Гап дунёнинг энг катта армияларидан бири ҳақида бормоқда. Ҳаммаси жуда тез ўзгариши мумкин», — деди у.
АҚШ ортидан дунёнинг 30 та давлатлари, жумладан, Европа иттифоқига аъзо давлатлар, шунингдек, БАА, Австралия ва Канада ўз фуқароларига Украинани тарк этишни ёки бу давлатга режалаштирилган сафарларни қолдиришни тавсия этдилар.
Россиянинг Украинага 16 февраль санасида амалга оширилиши мумкин бўлган эҳтимолий ҳужуми ҳақида тўхталадиган бўлсак, бу ҳақда илк марта Германиянинг Spiegel нашрида хабар берилган эди. Нашр маълумотларига кўра, АҚШ махсус хизматлари НАТО бўйича иттифоқдошларга шошилинч огоҳлантириш йўллаб, унда босқин айнан шу куни бошланиши мумкинлиги ҳақида аниқлик киритганлар. Spiegelнинг таъкидига кўра, инсайдерлар ҳам АҚШ бундай маълумотни Россиянинг ҳужумга доир режаларини йўққа чиқариш учун атайин тарқатган.
