5 февраль куни Пекинда Ўзбекистон президенти Шавкат Мирзиёев Хитой Халқ Республикаси Раиси Си Цзиньпин билан учрашди, дея хабар қилди давлат раҳбари матбуот хизмати. Икки мамлакат етакчиларининг расмий учрашуви қишки Олимпиада доирасида Хитой пойтахтидаги Бутунхитой халқ вакиллари кенгаши уйида бўлиб ўтди.
Ташриф чоғида беш йиллик Савдо-иқтисодий ва инвестициявий ҳамкорлик дастури имзоланди. Товар айирбошлаш 2021 йил якунига кўра рекорд кўрсаткичга етгани қайд этилди. Хитойдан Ўзбекистон иқтисодиётига киритилган жами инвестициялар ҳажми 9 млрд долларни ташкил этди.
Икки давлат раҳбарлари камбағалликка ва коррупцияга қарши курашиш борасида Хитой тажрибасини ўрганиш ва жорий қилиш бўйича қўшма чора-тадбирларни амалга оширишга келишиб олди.
Халқаро ва минтақавий кун тартибидаги масалалар, шу жумладан Афғонистонда тез фурсатда тинчлик ўрнатилишига ва иқтисодий тикланишга кўмаклашиш масаласи кўриб чиқилди.
Раис Си Цзиньпин Хитой Ўзбекистон билан пандемияга қарши кураш ва қашшоқликни қисқартиришда ҳамкорлик қилишга, шунингдек, хавфсизлик соҳасида ҳамкорликни чуқурлаштиришга тайёр эканини айтди, деб ёзди «Синхуа» ахборот агентлиги.
Унинг таъкидлашича, ХХР Ўзбекистонга «замонавий саноат тизимини барпо этиш», «Хитой-Қирғизистон-Ўзбекистон» темир йўли лойиҳасининг техник-иқтисодий асосларини ишлаб чиқишни жадаллаштиришда ҳам ёрдам беришга тайёр ва уни тезроқ ишга тушириш тарафдори.
Си Цзиньпин мамлакатлар табиий газ ва қайта тикланадиган энергия бўйича ҳамкорликни кучайтириши кераклигини қўшимча қилди.
Агентлик хабарига кўра, Шавкат Мирзиёев Хитойга Марказий Осиёда биринчи вакцина ишлаб чиқариш марказини яратгани учун миннатдорлик билдириб, «Бир камар, бир йўл» лойиҳаси доирасида ҳамкорлик қилишга тайёр эканликларини таъкидлади.
2020 йил кузида Ўзбекистон Хитой билан камбағалликни қисқартириш соҳасида ҳамкорлик қилишдан манфаатдор экани маълум қилинган эди. Иқтисодий ривожланиш ва камбағалликни қисқартириш вазирлиги бунинг учун Хитойдан маслаҳатчи жалб қилишни режалаштирган.
