Пайшанба куни Тошкентнинг Мирзо Улуғбек кўчасида Spark ҳайдовчиси йўл ўртасида машинадан тушиб, «ВАЗ-2199» русумли автомашинанинг ғилдирагини тепиб, сўнг тўппончадан машинага қарата ўқ узди. Ушбу ҳолат акс этган видеолавҳалар Никита Макаренконинг Telegram-каналида эълон қилинди.
Кечқурун Тошкент шаҳар ИИББ кўк рангли костюм кийган шахс — 1990 йилда туғилган З.С. — пневматик тўппончадан ўқ узганини хабар қилди. Ўқ узилган «ВАЗ-2199» автомобили ҳайдовчиси 1985 йилда туғилган Ғ.A.га тегишли бўлиб, З.С. билан турмуш ўртоғини рашк қилиш сабабли ўзаро жанжаллашиб қолган.
Ҳодиса оқибатида ҳеч ким жабрланмаган, дея қайд этди ИИББ. Мирзо Улуғбек тумани ИИБ томонидан терговга қадар текширув ишлари бошланди.
Бошқарма «жамиятда юриш-туриш қоидаларини қасддан менсимаган шахсга нисбатан қатъий қонуний чора кўрилишини» маълум қилди.
