ДХХ томонидан «Туркистон ислом ҳаракати» («ТИҲ») халқаро террористик ташкилоти аъзоси, Ўзбекистон ҳудудида террористик жиноятларни содир этганлиги учун 23 йилдан буён қидирувда бўлган фуқаро У. С. қўлга олинди.
Таъкидланишича, 1967 йил Тошкент вилоятида туғилган У. С. иорданиялик Амир Хаттоб томонидан Чеченистонда ташкил этилган жанговар лагерда 1998 йилда тайёргарликдан ўтиб, 1999 йилнинг 16 февраль куни Тошкент шаҳрида амалга оширилган қўпорувчилик ҳаракатларида иштирок этган. У ўша йилнинг март ойида айланма йўллар орқали хорижга чиқиб кетган.
Шунингдек, у Чеченистонда ташкил этилган жангариларни тайёрлаш лагерларига «Туркистон ислом ҳаракати» халқаро террористик ташкилотининг Ўзбекистондан бўлган аъзоларини жўнатиш билан ҳам шуғулланган.
У. С. 2001 йилнинг ноябрь ойида бошқа шахснинг номига расмийлаштирилган сохта ҳужжатлар асосида МДҲга аъзо давлатлардан бирининг фуқаролигини олиб, ўша мамлакат ҳудудида яшириниб юрган, дейилади хабарда.
ДХХнинг чет эл махсус хизматлари билан ҳамкорликда олиб борган тезкор-қидирув тадбирлари натижасида У. С. ҳибсга олинган ва Ўзбекистонга экстрадация қилинган.
Ҳозирда унга нисбатан қўзғатилган жиноят иши доирасида тергов ҳаракатлари олиб борилмоқда.
2021 йилнинг сентябрь ойида 16 февраль воқеаларида иштирок этганликда гумон қилинган яна бир шахс қўлга олингани ҳақида хабар берилганди.
Эслатиб ўтамиз, 1999 йил 16 февралда Тошкентда, шу жумладан Мустақиллик майдонидаги ҳукумат биноси яқинида бир қатор кучли портлашлар содир бўлган. Расмий маълумотларга кўра, бунинг оқибатида 13 киши ҳалок бўлган, 100 дан ортиқ одам жароҳат олган.
Ўшанда Ўзбекистоннинг биринчи президенти Ислом Каримов терактнинг диний экстремистлар томонидан уюштирилгани, уларнинг мақсадларидан бири унинг ҳаётига суиқасд уюштиришдан иборат бўлганини таъкидлаган эди.
