Буюк Британия 10 январдан бошлаб Ўзбекистонда берилган коронавирусга қарши эмланганлик тўғрисидаги сертификатларни расман тан олади. Бу ҳақда «Дунё» АА хабар берди. Буни тасдиқловчи маълумот Британия ҳукумати сайтида ҳам келтирилган.

Буюк Британияга сафар қилаётган Ўзбекистон фуқаролари хорижга чиқишдан камида 14 кун олдин тўлиқ вакцинация курсини ўтаган бўлсалар, эмланганлик тўғрисидаги сертификат ҳақиқий ҳисобланади.

Буюк Британияга кириш учун қуйидаги вакциналардан бири билан эмланганлик бўлиш шарт:

  • Covaxin;
  • Moderna;
  • Janssen (битта доза);
  • Novavax (Nuvaxovid ва Covovax);
  • Oxford/AstraZeneca;
  • Pfizer/BioNTech;
  • Sinopharm Beijing;
  • Sinovac-CoronaVac.

Ўзбекистонда энг кўп қўлланилаётган ZF-UZ-VAC 2001 хитой-ўзбек вакцинаси улар орасида мавжуд эмас.

Вакцинация сертификатига эга бўлган Ўзбекистон фуқаролари эндиликда Англия ҳудудига кириш учун ПЗР тестини тақдим этишлари керак бўлмайди ва улар 10 кунлик карантин ўтиш талабидан озод қилинади. Бундан ташқари, Британия ҳудудига киргандан сўнг ПЗР тест ўрнига анча арзонроқ турувчи ИФА-тест (lateral flow test) топширилади, дейилади «Дунё» хабарида.

Батафсил маълумот учун Буюк Британия ҳукумати сайтига ўтинг.

Олдинроқ «Газета.uz» коронавирусга қарши эмланганлик тўғрисида сертификат олиш бўйича қўлланмани эълон қилган эди. Август ойи ҳолатига, Ўзбекистон сертификатларини фақат Венгрия давлати тан олганлиги айтилган эди.