Жиноят кодексига коррупцияга оид жиноятлар учун жавобгарлик чораларини кучайтиришни назарда тутувчи қонун лойиҳаси Олий Мажлис Қонунчилик палатасига киритилди. Бу ҳақда Коррупцияга қарши курашиш агентлиги хабар берди.
Унга кўра, Жиноят кодекси лойиҳасида «коррупцияга оид жиноятлар» тушунчасига аниқ таъриф берилмоқда ва 15 турдаги жиноятлар бу тоифага киритилмоқда.
Хусусан, эндиликда, ўзлаштириш ёки растрата қилиш йўли билан талон-торож қилиш ёки фирибгарлик жиноятларини мансаб мавқеини суиистеъмол қилиш ёки хизмат мавқеидан фойдаланиб содир этганлик учун 10 йилгача озодликдан маҳрум қилиш жазоси киритилмоқда. Ҳозиргача бу турдаги жиноятларга 5 йил озодликдан маҳрум қилиш жазоси берилган.
Таклиф этилаётган ўзгартишларга кўра, энди пора олиш, пора бериш ва пора олиш-беришда воситачилик қилиш жиноятлари учун 20 йилгача озодликдан маҳрум қилиш жазоси белгиланиши мумкин.
Қолаверса, порахўрлик жиноятларини содир этган шахслар жазони ўташ муддатидан илгари шартли озод қилинмайди ва жазо енгилроғи билан алмаштирилмайди.
Мазкур ўзгартишлар президентнинг 6 июлдаги фармони асосида киритилмоқда. Унда Жиноят кодексида коррупцияга оид жиноятлар тоифасига кирувчи моддаларнинг аниқ рўйхатини белгилаш, коррупция учун жазо чораларини узоқ муддатли озодликдан маҳрум қилишгача кескин кучайтириш назарда тутилганди.
Эслатиб ўтамиз, давлат раҳбари 29 майдаги видеоселектор йиғилишида одамлар Ўзбекистонда коррупция йўқлигига ишониши керак дея таъкидлаганди. «Энди тизим бундан ҳам қаттиқ бўлади, мана шуни билинглар. Қонун устувор — жазо муқаррар бўлиши керак», — дея таъкидлаганди Шавкат Мирзиёев.
