The Economist журналининг 2021 йилги рейтингида Тошкент дунёнинг энг арзон шаҳарлари учлигидан жой олди. Рейтингни тузишда барча шаҳарлар базавий 100 рейтингига эга Нью-Йорк билан солиштирилган.
Таҳлилчилар 200 та товар ва хизматлар нархини таққослашган. Унга кўра, Исроил пойтахти Тел-Авив яшаш учун энг қиммат шаҳарлар рейтингида биринчи ўринни эгаллади, бир йил давомида ушбу шаҳар беш поғона юқорига кўтарилди.
Қайд этилишича, Тел-Авив биринчи марта шекел курсининг тез ўсиши, шунингдек, озиқ-овқат, спиртли ичимликлар ва транспорт нархлари ўсиши сабабли рейтингнинг биринчи ўринидан жой олди. Дунёнинг энг қиммат шаҳарлари ўнталигига, шунингдек Нью-Йорк, Женева, Копенгаген, Лос-Анжелес ва Осака ҳам кирди.
Таъкидланишича, одатда энг қулай ва хавфсиз бўлган шаҳарларда яшаш қимматроққа тушади. Яъни энг қиммат шаҳарлар рўйхатига тушган шаҳарларнинг деярли барчаси аввалроқ дунёнинг яшаш мумкин бўлган энг яхши жойлар рўйхатига киритилган.
Дунёнинг учта энг арзон шаҳарлари рўйхати:
- Дамашқ (Сурия);
- Триполи (Ливия);
- Тошкент (Ўзбекистон).
Эслатиб ўтамиз, Тошкент дунёнинг энг арзон шаҳарлари рўйхатида 2020 йилда бешинчи, 2019 йилда учинчи ўринни эгаллаган эди. Шунингдек, Ўзбекистон пойтахти 2021 йилда хорижлик мутахассислар учун энг арзон шаҳарлар учлигига кирди (2020 йилда ҳам).
