Санитария-эпидемиологик осойишталик ва жамоат саломатлиги хизмати бошлиғи ўринбосари, тиббиёт фанлари доктори, профессор Нурмат Отабеков коронавируснинг янги тури «Omicron» бўйича ўзининг фикрлари билан ўртоқлашди, деб хабар бермоқда ССВ матбуот хизмати.
«Вируслар — оддий, ҳужайрасиз организмлар, — дейди Нурмат Отабеков. — Уларда ўзгарувчанлик юзага келиши табиий ҳол. Масалан, ҳозиргача коронавируснинг қўзғатувчиси, яъни SARS-CoV-2нинг 7 мингдан зиёд мутацияга учраган штаммлари аниқлаган. „Omicron“ ҳам шулардан бири».
Унинг сўзларига кўра, Ўзбекистон янги штаммнинг тарқалиш ўчоғи бўлган Жанубий Африка давлатлари билан бевосита авиация алоқалари ўрнатмаган бўлса-да, ушбу касаллик иккинчи ва учинчи мамлакатлар орқали кириб келиши эҳтимоли йўқ эмас.
«Янги штамм учун алоҳида протокол ишлаб чиқиш масаласини, албатта, вақт кўрсатади. Шунга қарамай, мавжуд диагностика, даволаш ва профилактика имкониятларидан самарали фойдаланиш бу вирус турига қарши ҳам натижа беради, деб ҳисоблайман», — деди мутахассис.
Таъкидланишича, ўтган даврда Ўзбекистонда COVID-19`ни даволаш бўйича катта тажриба тўпланган.
«Бу ҳақли равишда халқаро миқёсда ҳам эътироф этиляпти. Шу маънода, муолажа жараёнларини белгиланган даволаш стандартлари асосида олиб борсак, касаллик қандай интенсивликда тарқалмасин, асоратларсиз тузалиб кетишига замин яратиш мумкин», — дейди СЭО раҳбари ўринбосари.
Унинг айтишича, карантин билан боғлиқ профилактик чоралар бекор бўлгани йўқ. «Аммо одамлар тиббий ниқоб тақиш, ижтимиой масофа сақлаш, антисептик воситалардан фойдаланиш каби оддий қоидаларга ҳам етарлича амал қилмай қўйгани ачинарли ҳолат», — деди у.
Профессорнинг фикрича, «жамоавий иммунитетни шакллантириш, яъни оммавий эмланиш кўрсаткичларини ошириш орқали ҳам эпидемиологик вазиятни барқарор сақлаб туриш мумкин».
«Чунки вакциналар SARS-CoV-2нинг ҳар қандай мутацияга учраган штаммида самара беради. Ҳатто янги штаммни юқтириб олган ҳолатда ҳам барча дозада эмланганларда касаллик енгил ва жиддий асоратларсиз ўтади», — деди Нурмат Отабеков.
Қолаверса, мамлакатда айни пайтда аҳолига ихтиёрий равишда бустер-доза билан эмланишлари учун имкониятлар яратиб берилгани тилга олинган.
«Юртимизга коронавируснинг турли штаммлари ҳар сафар хориждан қайтган фуқароларимиз орқали кириб келганини ҳисобга олсак, айни кунларда касаллик тарқалаётган мамлакатларга зарурат бўлмаса, вақтинча бормасликни тавсия қиламиз», — деди у.
Айни вақт Ўзбекистонда аҳолини эмлашда жами 6 турдаги — AstraZeneca, ZF-UZ-VAC2001, «Sputnik V», Moderna, Pfizer/BioNTech ҳамда Sinovac вакциналаридан фойдаланилмоқда.
Аввалроқ, Жаҳон соғлиқни сақлаш ташкилоти Жанубий Африкада аниқланган коронавируснинг янги штаммига Омикрон деб номлагани ва уни «хавотирли вариант» деб таснифлагани ҳақида ёзган эдик.
