Франция, Қатар ва Япониянинг «EDF, Nebras Power, Sojitz Corporation» компаниялари консорциуми Сирдарё вилоятининг Ширин шаҳрида қуввати 1600 МВт бўлган иссиқлик электр станциясини қуриш бўйича халқаро тендерда ғолиб чиқди, дея хабар берди Инвестициялар ва ташқи савдо вазирлиги матбуот хизмати.
Дастлабки саралаш танловида Хитой, Жанубий Корея, Япония, Саудия Арабистони, БАА ва Франциядан 10 та компания иштирок этган ва улардан 8 таси ушбу танловдан муваффақиятли ўтган.
Савдо иштирокчиларининг тақдим этган таклифларини баҳолаш натижаларига кўра, иккита компания ва битта консорциум электр энергияси тарифлари билан молиявий таклифларни очишга рухсат этилди. Булар «ACWA Power» ҳамда «Powerchina Resources Ltd» компаниялари, шунингдек, «EDF, Nebras Power, Sojitz Corporation» компаниялар Консорциумидир.
Натижаларга кўра, консорциум ишлаб чиқариладиган 1 кВт*с электр энергия учун 3,367 АҚШ центга тенг бўлган тарифи билан иссиқлик электр станциясини қуриш бўйича халқаро тендер ғолиби деб эълон қилинди. «Powerchina Resources Ltd» ишлаб чиқариладиган 1 кВт*с электр энергия учун 3,471 АҚШ центга тенг бўлган тарифи билан ушбу тендернинг захира ғолиби деб эълон қилинди.
ИЭС 2025 йилнинг ўртасида ишга туширилиши кутилмоқда. Электр станциясининг ишга туширилиши йилига 12 млрд кВт*с электр энергиясини ишлаб чиқаришни таъминлайди.
«Лойиҳанинг амалга оширилиши Ўзбекистонга электр энергияси ҳажмини ошириш мақсадларига эришишга, 1,5 млн хонадонни қўшимча электр энергияси билан таъминлаш, шунингдек, қурилиш вақтида 1000 га яқин янги ҳамда станциядан фойдаланиш вақтида 50 та доимий иш ўрни яратишга имкон беради», — дея қайт этди вазирлик.
Лойиҳани амалга ошириш учун жалб қилинган инвестициялар ҳажми 1,2 миллиард долларга баҳоланмоқда.
