Бугун «Миллий тикланиш» демократик партияси Марказий кенгашида брифинг бўлиб ўтди, дея хабар берди партия ахборот хизмати.
Маълум қилинишича, брифингда Алишер Қодиров сўзга чиқиб, Ўзбекистон президенти сайлови ниҳоясига етганини қайд этди.
Партия раиси ушбу сайлов натижаларини эса кейинги йилларда мамлакатни янгилаш, ҳаётнинг барча соҳаларини янада демократлаштиришга қаратилган сиёсат инъикоси бўлганини таъкидлади.
«Алишер Қодиров Шавкат Мирзиёевни ўзи ва партия номидан самимий табриклаб, барчанинг умумий мақсади бўлган она Ватаннинг тараққиёти ва халқнинг фаровонлиги йўлида қўлни-қўлга бериб, биргаликда фаолият кўрсатиш лозимлигини таъкидлади», — дейилади хабарда.
Эслатиб ўтамиз, август ойи бошида «Миллий тикланиш» номзод сифатида Алишер Қодировни кўрсатганида у президентлик сайловларида ғалаба қозонишни ният қилаётганини бирдирган эди. Қодиров ўшанда мазкур сайлов аввалгиларидан фарқ қилишини айтганди.
Сентябрь ойида Алишер Қодиров жиззахлик сайловчилар билан учрашувда сайловда ўзига битта Шавкат Мирзиёевни рақиб сифатида кўришини маълум қилган эди.
Аввалроқ ХДПдан номзод Мақсуда Ворисова Шавкат Мирзиёевни президентлик сайловида ғолиб бўлгани билан табриклагани ҳақида хабар берилган эди. У «сайлов натижаларини тўла-тўкис тан олишини» айтди. «Шавкат Мирзиёев томонидан ишлаб чиқилиб, эълон қилинган „Янги Ўзбекистон Стратегияси“ халқимизнинг қалбидан чуқур ўрин эгаллади», — дея қўшимча қилди Мақсуда Ворисова.
