USM холдинги бош директори Иван Стрешинский Россиянинг «Коммерсант» газетасига берган интервьюсида холдинг таркибидаги компаниялар фаолияти ва истиқболлари ҳақида сўзлар экан, «МегаФон» уяли алоқа операторининг Ўзбекистон бозорига кириш сабабларига ҳам тўхталиб ўтди.

Стрешинскийнинг сўзларига кўра, Ўзбекистонга кириш қўшма корхона иштирокчиларидан бири бўлган компания эгаси — «МегаФон» учун операцияларни кенгайтириш демакдир.

Ўзбекистон эса битимдан яхшиланган ва янада сифатли алоқага эга бўлади. Бу, ўз навбатида, «бошқа кўплаб нарсаларга асос бўлади».

Алишер Усмонов компанияси Ўзбекистон коммуникация инфратузилмаси ва унинг ривожланишига катта миқдорда маблағ киритмоқчи. Қайд этилишича, холдинг даромад олишдан ташқари, бошқа мақсадларга ҳам эга.

«Нима бўлганда ҳам, Ўзбекистон Алишер [Усмонов] Бурхановичнинг туғилган жойи, у ўша ерда туғилган ва ёрдам беришни хоҳлайди, — деди Стрешинский. — Биз эса мамлакатни янада ривожлантириш учун платформа яратмоқчимиз».

Стрешинский компаниянинг Ўзбекистондаги бизнеси «ҳали бошланғич босқичда» эканини қўшимча қилди.

«МегаФон» ва USM Telecom`нинг Ўзбекистон бозорига кириши жорий йилнинг февралида эълон қилинган эди. Компаниялар Ўзбекистон ҳукумати билан Digital Holding қўшма корхонасини ташкил этиш тўғрисидаги келишувга эришди.

Унинг 51 фоизлик капиталига таъсисчилари «МегаФон» ва «ЮэСэМ Телеком» бўлган «Диджитал Инвест» эгалик қилади. Қолган 49 фоизини эса Ўзбекистон Давлат активларини бошқариш агентлиги назорат қилади. Шартномани имзолаш маросими 29 сентябрь куни бўлиб ўтди.

Digital Holding таркибига Ucell мобил оператори, шунингдек, CRPT Turon ва ICS Holding Uzbekistan киради. Компания телекоммуникациялар эришувчанлигини кенгайтириш ва сифатини ошириш ҳамда товарларни рақамли маркировкалаш, маълумотларни сақлаш ва қайта ишлаш билан шуғулланади. ҚКга бир қатор имтиёз ва енгилликлар ҳам берилган. Жумладан, давлат органларига у билан тендерсиз шартнома тузишга рухсат берилган.