Жиноят кодекси ва Маъмурий жавобгарлик тўғрисидаги кодексга ўзгартишлар киритишни назарда тутувчи қонун президент томонидан имзоланди. Бу ҳақда «Huquqiy axborot» Telegram-канали хабар берди.

Киритилган ўзгартишларга кўра, ҳокимият вакилига ёки фуқаровий бурчини бажараётган шахсга қаршилик учун жиноий жавобгарлик кучайтирилди. Бундай ҳаракатлар:

  • БҲМнинг 50 бараваридан 100 бараваригача жарима (илгари фақат 50 бараваригача);
  • 1 йилдан 3 йилгача озодликни чеклаш (илгари 1 йилгача);
  • 1 йилдан 3 йилгача озодликдан маҳрум қилиш билан жазоланади (илгари 1 йилгача).

Маъмурий жавобгарлик тўғрисидаги кодексда ҳокимият вакилининг, ички ишлар ва Миллий гвардия ходимларининг қонуний талабларини бажармаганлик учун ҳам жавобгарлик чоралари кучайтирилиб, жарима миқдорлари оширилди.

Маълумот учун, Ўзбекистоннинг ҳар бир фуқароси Конституция ва қонунларга риоя этиши, бошқа фуқароларнинг ҳуқуқлари, эркинликлари, шаъни ва қадр-қимматини ҳурмат қилиши, халқнинг тарихий, маънавий ва маданий меросини асраб авайлаши, атроф муҳитга эҳтиёткорона муносабатта бўлиши, шунингдек, солиқлар ва маҳаллий йиғимларни тўлаши ва Ўзбекистонни ҳимоя қилиши лозим.

Эслатиб ўтамиз, июнь ойида ҳокимият вакилига қаршилик кўрсатганлик учун жиноий жавобгарлик кучайтирилаётгани ҳақида хабар берилган эди.

Қонунчилик палатаси депутати Алишер Қодиров бунга ҳуқуқни муҳофаза қилувчиларнинг қонуний фаолиятига қаршилик кўрсатиш сони ошиб бораётганлигини сабаб қилиб кўрсатган эди. Унинг қайд этишича, сўнгги вақтларда ҳуқуқни муҳофаза қилувчиларга тажовуз кайфияти ортиб бормоқда. «2018 йилдаги 24,1 минг ҳолат 2020 йилда 39 мингтага ортган», — деган эди у.

Депутат Дониёр Ғаниев эса бундай ҳолатлар ички ишлар органлари ходимларининг соғлиғига зарар бўлаётганини таъкидлади.

Сентябрь ойи охирида ҳокимият вакилига қаршилик кўрсатганлик учун жавобгарлик кучайтирилиши тўғрисидаги қонун сенаторлар томонидан маъқулланди. Мазкур қонун билан мамлакатда ҳокимият вакилларининг ҳуқуқий ҳимояси таъминланиши айтилди.

Сенатор Шуҳрат Чўлиевнинг берган маълумотларига кўра, ИИО ходимларининг ҳуқуқбузарликларни тўхтатиш, ҳужжатларни текшириш учун тақдим этиш, транспорт воситасини тўхтатиш каби қонуний талабларни бажармаслик борасида 2018 йили 24 минг 185 та маъмурий ҳуқуқбузарлик қайд этилган. Ушбу кўрсаткич 2019 йилда 29 минг 575 тани, 2020 йилда эса 38 минг 911 тани ташкил этган.

Шунингдек, қўлланилган жазо чораларига қарамасдан фуқаролар томонидан 2018 йилда 972 та, 2019 йилда 2265 та, 2020 йилда эса 4169 та маъмурий ҳуқуқбузарлик такроран содир этилган.

Маълумотга кўра, ҳокимият вакилига фаол қаршилик кўрсатганлик учун ЖКнинг тегишли моддаси билан 2018 йилда 248 та, 2019 йилда 243 та, 2020 йилда эса 251 та жиноят иши судларга юборилган.