ЎзЛиДеПдан президентликка номзод Шавкат Мирзиёев Хоразмда сайловчилар билан учрашувда «прописка» ва фуқаролик масаласи ҳақида гапирди. Бу ҳақда ЎзЛиДеП ахборот хизмати хабар берди.

«Мен ҳаётимда кўп қийинчиликларни кўрганман. Уйсиз яшаш, уйланиб болам билан ижарама-ижара яшаш… Шунинг учун мен кўп уй қураман. Биламанки, бир пайтлар Тошкентда „прописка“ олиш азоб эди, мумкин эмасди. Иккинчи қарорим, Тошкентда „прописка“ олиш ҳаммага… Ўзларингиз ҳам сезяпсизлар, ҳозир Тошкентга борсангиз сизлар ҳам Ўзбекистон фуқаросисизлар. Нимага пойтахтда яшашингиз мумкин эмас? 10−15 йил институтда „кандидат наук“ (фан номзоди — таҳр.) бўлмагунимча квартирам ҳам йўқ эди, пропискам ҳам йўқ эди. Битта айбим — Тошкентда туғилмаганим учун эди. Нима дегани бу? Адолат эмас-ку бу», — деди президент.

Унинг таъкидлашича, давлат раҳбари президентлик лавозимига келганида оддий инсонлар эркин яшаши учун ҳаракат қилди.

«Ёки фуқароликка қабул қилиш… Бу нима деган гап? 30 йил яшайди Ўзбекистонда, фуқаро эмас. Дунё ҳамжамияти ҳам бизга: „э, бу ўзбеклар“… дерди. Биз билан кўришмас ҳам эди. Ҳозир ҳамма бизга талпиняпти. Биз битта нарса қилдик. Менинг қилган ишим 5 йилда, мен инсон қадрини 1-ўринга қўйдим», — дея қўшимча қилди у.

2020 йилнинг бошида «Газета.uz» парламент ва ҳукумат вакиллари Ўзбекистон президенти Шавкат Мирзиёевнинг Олий Мажлисга мурожаатномасидан сўнг мавжуд прописка тизимини очиқ танқид қила бошлагани ҳақида ёзган эди.

2020 йилнинг 1 апрелидан президент фармонига асосан Тошкент шаҳри ва вилоятида кўчмас мулкка эга бўлишда фуқародан доимий яшаш жойи бўйича рўйхатга олиш талаб этиш бекор қилинди, шунингдек, пойтахтда рўйхатдан ўтмасдан яшаш муддати 15 кунга узайтирилди.

Ўша йилнинг май ойидан бошлаб «доимий прописка» тушунчаси ўрнига «доимий яшаш жойи бўйича рўйхатга олиш» тушунчаси киритилди.