Ягона интерактив давлат хизматлари порталида (ЯИДХП) автотранспорт воситалари ойналарининг тусини ўзгартиришга (қорайтириш) рухсатнома олиш хизмати йўлга қўйилди. Аввалроқ, 1 октябрдан автотранспортлар ойналарининг тусини ўзгартиришга рухсатнома бериш бўйича давлат хизмати фақат Ягона интерактив давлат хизматлари портали орқали кўрсатилиши ҳақида хабар берган эдик.

ЯИДХП орқали рухсатнома олиш нархи белгиланган миқдорнинг 90 фоизини ташкил қилади. Масалан, орқа ойналарни қорайтириш жисмоний шахсларга 5 эмас, балки 4.5 БХМ этиб белгиланди (1,35 млн сўм ўрнига 1,215 млн). Тўлиқ қорайтириш (олд ва орқа ён ойналар) 50 эмас, 45 БХМ (13,5 млн сўм ўрнига 12,15 млн) бўлади.

Рухсатнома — QR- кодли электрон сертификат тўлов амалга оширилган пайтдан бошлаб 2 соат ичида берилади. Уни электрон ва қоғоз шаклда тақдим этиш мумкин. Аввал, автомобиль ойнасига стикер ёпиштириш талаб қилинган.

Эслатиб ўтамиз, 1 сентябрдан ҳайдовчилардан автомототранспортни бошқариш учун ишончнома, техник кўрикдан ўтказилганлиги тўғрисидаги маълумот ва «тонировка» рухсатномасини талаб этиш тартиби бекор қилинган эди.