Марҳум олим Андрей Кубатин Қозоғистоннинг Нурсултон шаҳрида жойлашган Халқаро туркий академиянинг олтин медали билан тақдирланди. Бу ҳақда «Газета.uz»га олимнинг турмуш ўртоғи Феруза Жуманиёзова маълум қилди.
Ушбу медаль 13 сентябрь куни Фанлар академиясининг Миллий археология марказида олимнинг рафиқасига топширилган.
Фото: Феруза Жуманиёзованинг Facebook саҳифасидан
Феруза Жуманиёзованинг қўшимча қилишича, ушбу академияда Андрей Кубатин 2014 йилнинг иккинчи ярмидан бошлаб ярим йил фаолият кўрсатган. Марҳум олим ўша вақтда «Доисламские монеты Тараза — İslam öncesi Taraz sikkeleri» китобини ёзган.
«Мен шахсан бу инсонга ва у етакчилик қилаётган академияга бутун оилам номидан ўз миннатдорчилигимни изҳор қиламан. Бундай эътироф учун катта раҳмат, деб қоламан. Бу юксак мукофот мен учун катта масъулият. Бу мукофот менга турмуш ўртоғимнинг тадқиқотларини тўплаб, алоҳида китоб ҳолида нашр қилиш, ўзим ҳам у бошлаган ишларни давом эттириш ва фарзандимизни отасидек етук олим қилиб етиштириш масъулиятини юклайди», — дейди Феруза Жуманиёзова.
Халқаро туркий академия президенти Дарҳан Хидиралининг ёзишича, Андрей Кубатиннинг академия, умуман, туркий халқлар тарихини ўрганишдаги хизматларини алоҳида эътироф этса арзийди. Қайд этилишича, Кубатин вафотига қадар учта монография ва саксондан ортиқ илмий мақолаларга муаллиф, бир неча халқаро конференциялар иштирокчиси бўлган.
Эслатиб ўтамиз, 2020 йил октябрида Андрей Кубатин коронавирус асоратларидан вафот этган эди.
2017 йилда олим Жиноят кодексининг 157-моддаси (давлатга хиёнат қилиш) билан айбланиб, беш йилга (апелляциягача — 11 йилгача) озодликдан маҳрум қилинган эди. Айбловга кўра, у чет эл олимига ноёб китобларнинг сканер қилинган нусхаларини берган. Халқаро инсон ҳуқуқлари ташкилотлари бу ишни уйдирма деб аташди. 2019 йил сентябрь ойида олим Жиноят ишлари бўйича Тошкент вилоят судининг қарори билан реабилитация қилинди.
