30 августга ўтар кечаси «Спутник V» вакцинасининг 90 минг дозалик 2-компоненти Тошкент халқаро аэропортида қабул қилиб олинди. Бу ҳақда ССВ матбуот хизмати хабар бермоқда.
««Спутник V»нинг бу компоненти ушбу вакцинанинг 1-компонентини қабул қилган фуқароларни иккинчи босқичда эмлаш учун мўлжалланган», — дейилади хабарда.
Бунга қадар Ўзбекистон санитария-эпидемиологик осойишталик ва жамоат саломатлиги хизмати, вакциналар ва иммунопрофилактика бўлими бошлиғи Дилором Турсунова 30 август куни ушбу вакцинадан олиб келиниши ҳақида маълум қилганди.
Қолаверса, у вакцинанинг биринчи ва иккинчи дозалари оралиғи 21 кун эканлиги боис орадаги узилиш инсонлар соғлиғига қандай таъсир кўрсатишига ҳам тўхталиб ўтди.
«Эндиликда 1-чи ва 2-чи дозаларининг ўртасидаги оралиқ узоқ муддатга чўзилганлиги сабабли вакцинани амал қилиш муддати тугади ёки бошқатдан олиш керак, деган гаплар аҳоли орасида кўпайди. Вакцина билан эмланиш оралиғи камида 21 кун деб белгиланган бўлса, 12 ҳафтагача узайтирилиши ҳам зиён келтирмайди. Вакцина олиб келиниши билан 1-компонент билан эмланган барча фуқароларга 2-компоненти ҳам қилинади», — дея ишонтирган эди Дилором Турсунова.
ССВ маълумотига қараганда, ҳозирга қадар мамлакатга келтирилган вакциналар сони 17 млн 946 минг 540 дозага етди:
- 460 000 доза «Спутник V»;
- 986 480 доза AstraZeneca;
- 13 500 000 миллион доза ZF-UZ-VAC2001;
- 3 000 060 доза Moderna.
28 август ҳолатига, Ўзбекистонда жами 14 млн 27 минг 520 доза вакцина қўлланилган:
- 1-босқич эмланганлар 9 391 909 нафар;
- 2-босқичда эмланганлар 3 401 179 нафар;
- 3-босқич эмланганлар 1 234 432 нафарни ташкил қилди.
Шу кунгача мамлакатда мавжуд вакцина билан тўлиқ эмланган фуқаролар 1 729 454 нафарни ташкил этмоқда. Ҳозирги пайтда эмлашни амалга ошириш таҳминан 3 млн 919 минг 20 доза вакцина мавжуд.
