Бош вазир Абдулла Арипов ўзбек-хитой вакцинаси билан биринчилардан бўлиб эмланган. Бу ҳақдаги ахборотни бош вазир матбуот хизмати ходими Бекзод Ҳидоятов Daryo`га маълум қилди.
Қайд этилишича, бош вазир Абдулла Арипов ўзбек-хитой вакцинаси билан 2021 йил бошида тўлиқ эмланиб бўлган. Уч босқичли эмланиш жараёнининг бирортасидан сўнг бош вазирда ножўя таъсирлар сезилмаган.
«Газета.uz» мухбирининг хабар беришича, бош вазир 2020 йилнинг декабрь ойида кўнгиллилар орасида вакцинанинг биринчи дозасини олган.
Аввалроқ, президент Шавкат Мирзиёев ҳам коронавирусга қарши тўлиқ эмланганлиги ҳақида хабар берилган эди.
Шунингдек, Олий Мажлис Сенати раиси Танзила Нарбаева май-июнь ойларида коронавирусга қарши Россиянинг «Спутник V» вакцинаси билан эмланган.
Эслатиб ўтамиз, аввалроқ мактабгача таълим вазири Агриппина Шин «Спутник V» вакцинасини олганлиги, инновацион ривожланиш вазири Иброҳим Абдураҳмонов эса хитой-ўзбек вакцинасининг синовида иштирок этгани, халқ таълими вазири Шерзод Шерматов хитой-ўзбек вакцинаси олгани ҳақида хабар берилган.
Шунингдек, Маданият вазири Озодбек Назарбеков ҳамда Маҳалла, Оилани қўллаб-қувватлаш вазири Раҳмат Маматов ҳамда Бош вазир ўринбосари Беҳзод Мусаев коронавирусга қарши эмлангани ҳақида хабар берилган эди.
