Президент 2 август куни «Ўзбекистон Республикасининг айрим қонун ҳужжатларига аҳолининг санитария-эпидемиологик осойишталигини таъминлашга қаратилган ўзгартишлар ва қўшимча киритиш тўғрисида"ги қонунни имзолади.
Ҳужжат Қонунчилик палатаси томонидан 27 июлда, Сенат томонидан эса 31 июлда маъқулланган.
Қонун билан Меҳнат кодексининг 113-моддасига ходим карантинли ва юқумли касалликлар таҳдиди бўлганда Бош давлат санитария врачи қарори асосида профилактик эмлашдан ўтишни рад этса (қарши кўрсатма мавжуд бўлмаганда) иш берувчи уни ишга қўймасликка ҳақли эканлигига оид кўшимча киритилди.
«Фуқаролар соғлиғини сақлаш тўғрисида"ги қонунга киритилган қўшимчага кўра, карантинли ва хавфли юқумли касалликлар тарқалиши таҳдиди бўлганда Бош давлат санитария врачининг қарори асосида аҳолини профилактик эмлашдан ўтказиш жорий этилиши белгиланди.
Мазкур қонун матбуот эълон қилинган, яъни бугундан бошлаб кучга кирди.
Адлия вазири Русланбек Давлетов мазкур ўзгартишлар ҳақида фикр билдира туриб, иш берувчи эмлашдан бош тортганни ишдан бўшатиши эмас, четлаштириши мумкин деган эди. «Агарда фуқаро вакцина олишни рад қиладиган бўлса, ҳеч ким унинг қўл-оёғини боғлаб, тиббий муассасага олиб бориб вакцина қилмайди», — дейди вазир.
Аввалроқ, Шавкат Мирзиёев олимларнинг тадқиқотига асосланиб коронавирус билан кураш ҳали яна камида 10 йил давом этишини маълум қилди. У фуқароларни коронавирусга қарши эмланишга ҳам чақирган эди. «Вакцина олганларга шифохонадан 4 кунда чиқяпти, эмланмаганларга эса жуда оғир бўляпти», — деди у.
Қолаверса, душанба кунги брифингда президент матбуот котиби Шерзод Асадов Шавкат Мирзиёевнинг вакцина олганини маълум қилди.
Бунга қадар, «Газета.uz» сўровига биноан омбудсман Феруза Эшматова мажбурий эмлаш ва уни қонунийлаштириш жараёни, бу борада халқаро норма ва тажриба, фақат бир вакцина мавжудлиги туфайли аҳолининг танлов ҳуқуқи бузилиши каби саволларга жавоб берди.
