Бош прокурорнинг биринчи ўринбосари Баҳриддин Валиевнинг маълум қилишича, охирги тўрт ярим йил ичида 9546 нафар шахс турли кўринишдаги коррупция жиноятларини содир этган. Бу ҳақда у АОКАда ўтказилган брифингда айтиб ўтди.
Таъкидланишича, мазкур жиноятлар оқибатида давлат ва фуқаролар манфаатларига 3 трлн 200 млрд сўмга яқин зиён етказилган. Бунинг қарийб 90%и айбдорлардан ундирилган.
«Бунинг орқасидан жамиятимиз ва фуқароларимизнинг азият чекиши, уларнинг сарсон бўлиши, бошқа-бошқа фирибгарлик орқасидан ва жиноятнинг бошқа турлари сабабли уларга етказилган зарар миқдорлари тўғрисида гап кетмаяпти ҳозир. Шуларни ҳам ҳисобга олсак, жуда катта зарарларга, катта оқибатларга олиб келяпти», — дея қўшимча қилади у.
Қайд этилишича, Бош прокуратурага «Коррупцияга қарши муросасиз муносабатда бўлиш муҳитини яратиш, давлат ва жамият бошқарувида коррупциявий омилларни кескин камайтириш ва бунда жамоатчилик иштирокини кенгайтириш чора-тадбирлари тўғрисида"ги президент фармон ва қарори қабул қилинишдан аввал чет эл малакаларини ўрганиш ва ижтимоий сўровлар ўтказиш топшириғи қўйилган.
Маълум қилинишича, «Ижтимоий фикр» маркази томонидан коррупцияга қарши курашиш тўғрисида ўтказилган сўровномада иштирокчиларнинг 62 фоизи коррупцияга қарши курашда «жиноий жавобгарликни қатъийлаштириш энг самарали чоралардан бири» деган фикрлар билдирган.
