Ижтимоий тармоқларда «Хатирчида машиналарни тўхташ мумкин эмас жойга тўхтаганини юбориб пул ишлаган одамни ушлашгани айтилмоқда» номли видео тарқалди. Мазкур ҳолат юзасидан Навоий вилояти ИИБ матбуот хизмати расмий муносабат билдирди.

Маълумотга кўра, 29 июнь куни Хатирчи туманида яшовчи Ш. А ҳамда С.О туман марказида таксичилик билан шуғулланувчиларнинг автомашиналари давлат рақамларини яширин равишда суратга олиб интернет ижтимоий тармоғига жойлаштиришмоқчи бўлган.

Аниқланишича, шу вақтда туман марказида таксичилик билан шуғулланувчи бир неча шахслар уларни кўриб, улардан нима сабабдан суратга тушириб юрганлигини, шу сабабли уларга жарима белгиланаётганлигини маьлум қилишган.

Улар суратга туширишмаганлигини айтганидан сўнг, таксичилар уларни уриб дўппослаб, суратга олган телефонини тортиб олишган ва Spark автомашинасига моддий зарар етказган, дейилади хабарда.

Ушбу шахсларнинг барчаси туман ИИБга олиб келиниб, шахсига аниқлик киритилган.

Ҳолат юзасидан суриштирув ишлари давом эттирилмоқда.

Олий Мажлис Қонунчилик палатаси депутати Расул Кушербаев кўчаларда одамларнинг қоидабузарликларни телефонга суратга олиши ва бунинг эвазига рағбатлантирилиши юзасидан ўз фикр-мулоҳазаларини билдирган эди. «Уларга 10−15 минг сўм бераяптими, эртага 100 минг сўм бериб, ватанингни сот, деса ҳам сотворишга тайёрлар кўп экан. Бу жуда ёмон», — деган эди у. Кушербаев қоидабузарларни аниқлашдан олдин инфратузилмани яхшилаб қўйишга кераклигини таъкидлаган.

Адлия вазири Русланбек Давлетов йўл ҳаракати қоидаларини бузаётганларни суратга олганларни рағбатлантириш тизими ҳақида: «Агар жамоат жойида одам ноқонуний хатти-ҳаракат билан шуғулланаётган бўлса, [қоидабузарликни тўхтатиш учун] керак бўлса, виждонимни сотишга ҳам тайёрман», — дея тушунтирган. У ҳуқуқбузарликлар ҳақида хабар бераётганларни ҳароқат қилмасликка чақириб, ҳозиргидек тинч замонда йилига минглаб одамлар йўлларда ўлиб кетаётганини эслатиб ўтган.