Олий Мажлис Қонунчилик палатаси депутати Расул Кушербаев тадбиркорлар томонидан фото ва видеофиксация воситаларининг ўрнатилиши, кўчаларда фуқароларнинг қоидабузарликларни шахсий телефонларига сурат олиб юборилиши бўйича ўз фикрларини билдирди.
У шахсий муносабатини нафақат депутат сифатида, балки барча қатори ҳайдовчи позициясидан билдираётганини айтган.
«Тадбиркорларнинг радар қўйиши ҳақида гапирадиган бўлсам, омадини берсин, қўяверишсин. Мен ҳам депутат сифатида «ҳа бу тадбиркорликни қўллаб-қувватлаш, у ёқ, бу ёқ», деб фикрларга қўшилишим мумкин. Лекин оддий фуқаро, ҳайдовчи сифатида айтадиган бўлсам, бу одамларни психологияга жуда ёмон таъсир қилаяпти. Биз етарли инфраструктура яратмай туриб ҳамма жойга радар қўйдик, яна телефонда суратга олиб, жўнатворса пул беради деб… Қўпол қилиб айтганда «козёл"лар жамиятига ўхшаб кетаяпти», — деди у.
Депутат «мен ҳам оддий инсонман. Бу «сотқинлик, «козёл"лик-ку, деб мен ҳам айтаман», дея сўзида давом этган.
«Аввало сен кимгадир шуни қўллаётган бўлсанг, шуни ўрнида ота-онанг ёки ўзинг бўлишингни тасаввур қил, ўзингдан ўтказгин. Агар ўзингда оғримаса, шуни қил, деган бўлар эдим. Балки бу инсонлар учун синовдир. Лекин мен шуни билдимки, ўзининг фойдаси йўлида ҳеч нарсадан тап тортмайдиган одамлар кўп экан. Уларга 10−15 минг сўм бераяптими, эртага 100 минг сўм бериб, ватанингни сот, деса ҳам сотворишга тайёрлар кўп экан. Бу жуда ёмон. Вақти келиб бу тўхтар. Aгар менинг қўлимда бўлганимда тўхтатган бўлар эдим», — дея таъкидлади Кушербаев.
Қуйи палата депутати жорий қилинаётган тартиблар бирор қонун билан белгилаб берилмаганини, балки, Ҳукумат ёки вазирлар ва идоралар қарорлари, қонуности ҳужжатлар билан тасдиқланаётганини қўшимча қилган.
У, шунингдек, бунинг оқибати қандай бўлишига эътибор қаратган.
«Адлия вазирлигидан рўйхатдан ўтказаяпти. Яна бир марта айтаман, бу яхшимас аслида. Лекин профилактика учун деб кимлардир айтаётгандир, тўғрисини айтсам, мен бунга қўшилмаган бўлар эдим. Бу қандай тарбия? Сотқинларни етиштириб чиқараётганга ўхшаб қолаяпти-да. Бу эртага нима оқибатларга олиб келиши мумкин? Яъники, шундан қайтмаган одам, эртага бундан ҳам оғирроқ нарсани таклиф қилсангиз „пул учун тап тортмайдиган одамларни“ яратиб қўймаяпмизми, деган жойи ҳам бор. Бироқ, иккинчи томони йўлларда тартиб бўлишига шароит яратиб беради», — деган Расул Кушербаев.
Депутат танганинг иккинчи томонини ҳам инобатга олиш лозимлигини қайд этган.
«Лекин «парковка» масаласи, йўлларни аҳволи — таъмирталаблиги, баъзан мажбур бўлиб қоидани бузиб қўяди. Ҳамма шароит қилиб қўйилган бўлса, ўшанда ҳам одамлар очиқчасига [қоида] бузаётган бўлса, бу ҳаддидан ошибди, мана шу ерга қилиш керак, яъни бошқалар ҳам расмга олиб жўнатаверсин, дер эдим. Лекин, ҳалигача инфратузилмани ўзи яхши қилиб бера олмаяпти-ку. Баъзи жойларда, бозорлар ва йирик савдо мажмуалари атрофида «парковка»нинг ўзи йўқ. Марказда ишхоналар жойлашган жойга боринг, айланиб юраверасиз қаерга қўйишни билмай. Касалхоналарни олдида шароит йўқ. Мажбур бўласиз қоидани бузиб қўйишга», — дея таъкидлади халқ вакили.
Мазкур видео аввалроқ, эълон қилиниб, айрим сабабларга кўра ўчириб ташланган эди. Депутат ижтимоий тармоқлардаги муҳокамалар сабаб қайта жойлаганини маълум қилган.
