Enter Engineering компанияси ва «Уралмашзавод» (УЗТМ-КАРТЭКС гуруҳи таркибида «Газпромбанка» саноат гуруҳига киради) консорциум шаклида Ўзбекистонда бойитувчи комбинат қуришади, дея хабар бермоқда Россия компаниясининг матбуот хизмати.
23 июнь куни компаниялар вакиллари Ўзбекистондаги энг катта катод миси ишлаб чиқарувчиси Олмалиқ кон-бойитувчи комбинати (ОКМК) билан тегишли келишувга эришди.
Олмалиқдаги мис-бойитиш комбинати мажмуасини (мис бойитиш фабрикаси-3 (МБФ)) лойиҳалаштириш, харид қилиш ва қурилиш учун EPC-контракт консорциум номидан Enter Engineering мухтор вакили Альфонсо Самонте Тенгко ва УЗТМ-КАРТЭКС гуруҳи бош директори Ян Центер имзолашди. ОКМК томонидан «Ёшлик-1 конини ўзлаштириш» инвестицион лойиҳасини амалга ошириш бўйича лойиҳа офисининг директори Баҳодиржон Сидиқов имзо чекди.
Шартноманинг умумий қиймати 2 млрд долларга баҳоланмоқда, лойиҳани амалга ошириш муддати 2023 йилгача. Ҳужжатга кўра, Олмалиқ КМКдаги фабрика тўлиқ қуриб берилади: Enter Engineering объектни лойиҳалаштириш ва қуриш бўйича ишларни амалга оширса, «Уралмашзавод» объектни технологик қурилмаларнинг тўлиқ мажмуаси билан таъминлайди.
Йилига 60 млн тонна қувватга эга бўладиган МБФ-3 учун «Уралмашзавод» 100дан ортиқ техника, шу жумладан катта ҳажмдаги тегирмонлар, ўрта ҳажмда майдалайдиган конусли майдаловчилар, пресс-валкалар, турли типдаги мурватлар ва бошқа қурилмаларни ишлаб чиқади.
Ҳозирда ОКМК «Ёшлик-1» конини ўзлаштирмоқда. Хабарда айтилишича, ушбу кондан руда қазиб олиш ишлари бошланганда ва кейинчалик у амалдаги «Қалмоққир» карьери билан бирлаштирилгандан кейин кон дунёдаги энг йирикларидан бири бўлади.
Баҳодиржон Сидиқовнинг тушунтиришча, ушбу шартномани бажариш учун консорциум танланганининг сабаби унинг рақобатбардошлигида, фабриканинг эксплуатацияга киритилишидаги муддатларда ва шартноманинг умумий суммасига молиялаштиришни жалб қилиш шартларида. Таклифларни баҳолаш жараёнида консорциумнинг маҳаллий ишчи кучларини жалб қилиш ҳамда ОКМКнинг Марказий таъмирлаш механика заводида ишлатиладиган қурилма учун эҳтиёт қисмлари ва материалларни ишлаб чиқаришни локализация қилиш имкониятларига ҳам эътибор қаратилган.
Бойитувчи фабриканинг қурилиши — Enter Engineering ва УЗТМ-КАРТЭКС (Уралмашзавод ва ИЗ-КАРТЭКСни бирлаштиради) компанияларининг биринчи қўшма лойиҳаси. Келгусида компаниялар ушбу тузилма доирасида Марказий Осиё ва Россия ҳудудида бошқа объектларни ҳам қуришда иштирок этишни режалаштиришмоқда.
Комбинатни аслида ким қуриши керак эди?
2020 йил май ойида имзоланган президент қарорига кўра, 2020−2025 йилларда «Ёшлик-I» конида ОКМКнинг очиқ карьери, шунингдек йилига 60 млн тонн рудани қайта ишлаш қувватига эга янги мис бойитиш фабрикасини (МБФ) қуриш режалаштирилган эди.
Ўшанда мис бойитиш фабрикасини қуришга Россиянинг Renaissance Heavy Industries (Туркиянинг Ronesans Holding компанияси тузилмасига киради) компаниясини жалб қилиш бўйича ОКМК таклифи ҳужжат билан маъқулланган эди. Компания билан 2020 йилнинг охирига қадар муҳандислик ишларини бажариш ва лойиҳалаштириш ҳамда қурилмаларни етказиб бериш бўйича иккита шартнома имзоланиши кутилаётган эди.
Аммо февраль ойида SFI Management Group компанияси кутилмаганда «Ўзметкомбинат», ОКМК ва «Ўзиккиламчиранглиметалл» компанияларининг ишончли бошқаруви бўйича бўйича шартномаларнинг бекор қилинганлиги ҳақида хабар берди. Бунга компания «Ўзбекистон ҳукумати томонидан ўзига юкланган вазифаларнинг аксарияти бажарилганлигини» сабаб қилиб кўрсатган эди. Шундан сўнг SFI вакиллари Қобул Шодиев, Қаҳрамон Муллажонов, Улуғбек Муҳамедов ва бошқалар кузатув кенгаши таркибидан чиқариб юборилган эди.
Март ойида Renaissance Heavy Industries ҳамда SFI Management Group компанияларини лойиҳадан чиқариб ташлаган президент қарори имзоланди.
