Туркияда карантин чекловлари юмшатилишининг иккинчи босқичи бошланди
Туркия президенти Ражаб Тоййиб Эрдўған 31 май куни COVID-19 коронавируси тарқалишига қарши курашиш учун киритилган баъзи чекловлар юмшатилишини эълон қилди. Эндиликда комендантлик соати душанбадан шанбагача 22:00 дан 5:00 гача амал қилади. Якшанба кунлари бутун кун давомида кўчага чиқишга рухсат берилмайди. Кафе ва ресторанлар ташриф буюрувчиларни соат 7:00 дан 21:00 гача қабул қилиши, етказиб бериш эса соат 00:00 гача ишлаши мумкин. Шунингдек, душанбадан шанбагача соат 7:00 дан 21:00 гача спорт заллари ва кўнгилочар боғлар очиқ бўлади. Эпидемиологик талаблар бажарилиши шарти билан тўй маросимлари очиқ ҳавода ёки уйда ўтказилиши мумкин.
17 май куни Туркияда карантин чекловлари юмшатилишининг биринчи босқичи бошланган эди. Таъкидланишича, қатъий чоралар мамлакатда коронавирус тарқалиш тезлигини сезиларли даражада камайтиришга ёрдам берди. — Anadolu.
Шунингдек:
- Грузияда 1 июндан бошлаб Россия, Туркия, Aрманистон ва Озарбайжон билан қуруқликдаги чегаралари сайёҳлар учун очилди. Чегаралар ўтган йилнинг март ойидан бери ёпиқ бўлган. Мамлакатнинг чегараларидан ўтиш учун тўлиқ вакцинация сертификати ва ПЗР тестининг салбий натижаси ёки фақат охирги 72 соат ичида қилинган ПЗР тестининг салбий натижаси керак бўлади. Шу билан бирга, барча ташриф буюрувчиларга тиббий суғурта қилдириш тавсия этилади.
- Исроилда 1 июндан бошлаб коронавирус пандемияси сабабли жорий қилинган деярли барча чекловлар бекор қилинди, биноларда (ёпиқ жойларда) ниқоб тақиш ва мамлакатга кирувчиларга карантиндан ўтиши талаблари бундан мустасно. Одамлар сонидаги барча чекловлар бекор қилинган. Бундан ташқари, исроилликлардан бирон бир жойга кириш учун COVID-19га қарши эмланганлиги ёки касалликдан тузалганлиги тўғрисидаги ҳужжат талаб этилмайди. Кейинги ҳафтада Исроил 12 ёшдан 15 ёшгача бўлган болаларни коронавирусга қарши эмлашни бошлайди. Таъкидланишича, 20 ёш ва ундан катта ёшдаги аҳолининг 70 фоиздан ортиғи эмланди.
Финляндия бош вазири давлат бюджети ҳисобидан сотиб олинган маҳсулотлардан воз кечади
Финляндия бош вазири Санна Марин озиқ-овқат имтиёзларидан, яъни унинг оиласи учун давлат бюджети ҳисобидан сотиб олинган маҳсулотлардан фойдаланишдан воз кечади. Маълум қилинишича, Хелсинки шаҳридаги Кесяранта қароргоҳида яшовчи Марин ва унинг оиласи учун нонушта маҳсулотлари учун бюджетдан ойига 300 евро сарфланган. Финляндия ҳукумати идораси томонидан олиб борилган ҳисоб-китобларга кўра, 2020 йил январидан 2021 йилгача бўлган даврда бош вазир оиласи учун озиқ-овқат маҳсулотларга бюджетдан 14,3 минг евродан ортиқ маблағ ажратилган, яъни ойига тахминан 850 евро сарфланган. Ҳозирда Хелсинки полицияси ушбу иш бўйича терговга қадар текширув ўтказмоқда. — ТАСС.
ЖССТ коронавирус штаммларини юнон алифбосидаги ҳарфлар билан номлашга қарор қилди
COVID-19 коронавируси штаммлари юнон алифбосидаги ҳарфлар билан белгиланади. ЖССТнинг таъкидлашича, бу штаммлар биринчи марта аниқланган мамлакатларни камситмаслик ва илмий бўлмаган суҳбатда талаффуз қилиш қулайлиги учун қилинмоқда. Янги тизимга кўра, B.1.1.7 коронавирусининг «инглизча» тури «Aлфа», биринчи бўлиб Жанубий Aфрикада топилган В.1.351 варианти «Бета», Бразилиянинг Р.1 тури — «Гамма», «ҳинд» турининг иккита кичик варианти В.1.617.2 ва В.1.617.1 — «Дельта» ва «Каппа» деб номланади. «Улар илмий номларни алмаштирмайди, балки жамоатчилик муҳокамасида ёрдам бериш учун мўлжалланган», деди ЖССТ етакчи эпидемиологи Мария ван Керкхов.
Юнон алифбосида 24 та ҳарф мавжуд. Эпсилон, Зета, Эта, Тета ва Йота кузатув олиб борилаётган вариантлар учун танланди. — Газета.uz
Дунёда илк бор парранда гриппининг H10N3 штамми билан касалланиш ҳолати қайд этилди
Парранда гриппининг H10N3 штаммини хитойлик эркак юқтириб олган. Aпрель ойининг охирларида у гриппга ўхшаш аломатлар билан Хитой шарқидаги Чжэньцзян касалхонасига ётқизилган. Бир ой ўтгач, унга H10N3 ташхиси қўйилди. 1 июнь куни Хитой соғлиқни сақлаш хизматлари «ушбу вируснинг кенг тарқалиши хавфи жуда озлигини» таъкидлашди. Ҳозир касалхонага ётқизилган эркакнинг аҳволи барқарор деб баҳоланмоқда. ХХР Соғлиқни сақлаш миллий комиссияси ушбу ҳолат дунёда илк бор қайд этилганини таъкидлади. Сўнгги марта мамлакатда парранда гриппи 2016 йил охири — 2017 йил бошида қайд этилган эди. Ўшанда гриппнинг H7N9 штамми билан касалланиш ҳолатлари кузатилган. — Интерфакс.
Бразилия мамлакат чегаларини ёпди
Бразилия ҳукумати коронавирус пандемияси тарқалиш хавфи туфайли чет элликларнинг, фуқаролигидан қатъи назар, мамлакатга киришини номаълум муддатга тақиқлади. Ҳаво транспорти бундан мустасно. Чекловлар SARS-CoV-2'нинг янги вариантлари (Буюк Британия, Жанубий Aфрика, Ҳиндистонда топилган турлари) тарқалишининг эҳтимолий эпидемиологик оқибатлари муносабати билан киритилган. Икки ҳафта олдин ушбу мамлакатларда бўлганларнинг мамлакатга киришига тўлиқ тақиқ қўйилган, шунингдек, ушбу давлатлар билан ҳаво қатнови тўхтатилган эди. Бразилияга кириш учун чет элликларга сўнгги 72 соатда олинган ПЗР тестининг салбий натижаси керак бўлади. — ТАСС.
31 май куни Бразилия пойтахти ва бир қатор шаҳарларида мамлакат президенти Жаир Болсонаруга қарши минглаб одамлар иштирокида норозилик намойишлари бўлиб ўтди. Намойишчилар уни коронавирусга қарши ҳаракатсизликда айбламоқда.
Шунингдек:
- Европа Иттифоқининг еттита мамлакати (Болгария, Чехия, Дания, Германия, Греция, Хорватия, Польша) 1 июндан бошлаб эмлаш сертификати тизимини ишга туширади. Тизим Европа Иттифоқида 1 июлдан бошлаб қўлланилади.
- Японияда Олимпия ўйинлари иштирокчиларини эмлаш жараёни бошланди.
- Беларусда иш берувчиларга иш ташлашга чақирган ходимларни ишдан бўшатишга рухсат берилди.
- Хитой Сурияга иқтисодиётини тиклашда, аҳоли турмушини яхшилашда, шунингдек коронавирус пандемиясининг янги турига қарши курашишда ҳар томонлама ёрдам беради.
