28 май куни Ўзбекистон футбол ассоциацияси Футбол фаолиятини назорат қилиш бўйича махсус инспекцияси томонидан Про лигада қатнашувчи «Янгиер» ҳамда «Шўртан» футбол клубларининг айрим вакиллари ҳақ эвазига келишилган ўйинларда қатнашганлиги ва тотализатор ўйнаб келган шахсларга ёрдам берганлиги аниқланди. Бу ҳақда ЎФA матбуот хизмати хабар берди.
Aниқланган ҳолатлар бўйича ЎФA махсус инспекцияси томонидан тегишли маълумотлар тўпланиб, ЎФA Этика қўмитасига кўриб чиқиш ва қарор қабул қилиш учун тақдим этилди.
Тақдим этилган маълумотлар бўйича ЎФA Этика қўмитасининг йиғилиши ўтказилиб, унда Про лига мусобақасида қатнашувчи «Янгиер» ҳамда «Шўртан» футбол клубларининг айрим вакилларига нисбатан интизомий чоралар қўлланилган. Бунда айрим футболчи ва мутахассислар келишилган ўйинларда қатнашганлиги, тотализатор ўйнаб келган шахсларга ёрдам берганлиги ҳамда ёрдам беришга уринганлиги учун 6 ойдан 1 йилгача бўлган муддатларга футбол билан боғлиқ ҳар қандай фаолиятдан четлатилди.
ЎФА хабарида «Янгиер» ва «Шўртан» футбол клубларининг айнан қайси футболчилари маълум муддатга четлатилгани ҳақида хабар берилмаган. Ҳолат юзасидан «Газета.uz» «Шўртан» футбол клуби матбуот хизмати билан боғланганида бу ҳақда маълумот бериш жамоанинг ваколатига кирмаслиги таъкидланди.
ЎФA юристи Дилшод Норқобилов «Газета.uz»га ушбу маълумотларни ошкор қилиш фақатгина Этика қўмитасининг ваколат доирасида эканлиги, шунингдек, мазкур маълумотлар шахсга доир маълумотлар ҳисобланишини инобатга олиб, уларни эълон қилиш шахснинг ҳуқуқ ва манфаатларига зиён етказмаса ёки ҳаётига хавф солмасагина Этика қўмитасининг қарори билан ошкор қилиниши мумкинлигини айтиб ўтди.
29 май куни Про лига доирасида 9-тур учрашувлари ўтказилди. «Янгиер» жамоаси ўз майдонида «Хоразм» билан куч синашди. «Шўртан» жамоаси эса «Оқтепа»га қарши меҳмонда баҳс олиб борди.
Маълумот учун, айни вақтда Ўзбекистон Про лигасида 9-турдан кейин «Янгиер» жамоаси 8 ўйинда қатнашиб, 2 ғалаба, 3 дуранг ва 3 мағлубият билан 6-ўринда бормоқда. «Шўртан» клуби эса 2 дуранг ҳамда 6 мағлубият қайд этиб, 9-поғонани эгаллаб турибди.
Президент Шавкат Мирзиёевнинг 2019 йил 4 декабрдаги «Ўзбекистонда футболни ривожлантиришни мутлақо янги босқичга олиб чиқиш чора-тадбирлари тўғрисида"ги фармонига кўра, 2021 йил 1 январдан бошлаб Капитал бозорини ривожлантириш агентлиги лицензияси асосида букмекерлик фаолиятини юритишга рухсат берилган эди.
Фармонда тегишли вазирлик ва идораларга 2020 йил 1 июнга қадар шахслар томонидан букмекерлик фаолиятини амалга оширишни бузиш, шунингдек, тотализатор ўйнаш, ўйинга ёки унинг натижасига таъсир ўтказиш мақсадида келишилган ўйинлар ўтказиш, уларда иштирок этиш юзасидан жавобгарликни белгилаш бўйича Жиноят кодекси ва Маъмурий жавобгарлик тўғрисидаги кодексга тегишли ўзгартириш ва қўшимчалар киритиш юзасидан Вазирлар Маҳкамасига таклифлар киритиш топширилган.
2020 йилда Суперлига ва Про лига иштирокчилари: футболчилар, мураббийлар, ҳакамлар, инспекторлар ва бошқа расмий шахслар «Футбол фаолиятини ҳимоя қилиш тўғрисида декларация»га имзо чекишган эди. Унга кўра, футбол расмийлари ПФЛ ва ЎФА томонидан қўйилган бир қатор шартларни қабул қилишди ва уларга розилик беришган. Улардан бири букмекерлик фаолиятида, тотализатор ўйинларида, футбол билан боғлиқ расмий спорт турларига пул тикиш каби ўйинларда уларнинг иштирок этиши қатъий тақиқланади. 2021 йилдан бошлаб бу каби ишларда иштирок этишга нисбатан Жиноят кодекси, Жиноят-процессуал кодекси ва Маъмурий жавобгарлик тўғрисидаги кодексига мувофиқ жавобгарлик белгиланиши керак эди.
Профессионал футбол лигаси раҳбари Диёр Имомхўжаев «Улар» лойиҳасига берган интервьюсида букмекерлик идораларининг қонунийлаштирилиши капиталнинг Ўзбекистондан чиқиб кетишини камайтиришга ёрдам беришини маълум қилган эди. Унинг сўзларига кўра, ўша вақтда мамлакат онлайн-тотализатор ва букмекерларнинг «қора бозор"ида $50 млн атрофида маблағ йўқотаётганди.
